२५६८ क्वःगु बुद्ध जयन्तीया लसताय् महिला बौद्ध समूहया ग्वसालय् शोभायात्रालिसें ३१ क्वःगु वार्षिकोत्सव हंगु दु ।
वंगु जेठ ५ गते शनिवाः जूगु ज्याझ्वलय् तपस्सि धम्म भन्तें बुद्ध पुजा व शील प्रार्थना याकूगु ज्याझ्वलय् श्रद्धाचारी गुरुमांया लिसें भन्ते व गुरुमापिनिगु ब्वति दुगु खः ।
ताःई न्ह्यःनिसें थुगु संस्थां बुद्धया धर्मयात प्रचार प्रसार यायेगु लिसें लय्पतिकं बुद्ध पुजा नं यानावयाच्वंगु दु ।
महिला बौद्ध समूहया निरन्तर ज्या यायेगु जाँगर खनाः थम्हं थुगु समुहयात ग्वाहालि यायेत दुनुगलंनिसें इच्छा दुगु व निभाः, वा, फय् मधासे बुद्ध धर्मयात निरन्तर ज्या यानावयाच्वंगुलिं बुद्धबारीइ ट्रस्त व्यवस्था यानाबियागु १२ वडाया नायः बालकृष्ण महर्जनं कनादिल । ज्याझ्वलय् मूपाहाँकथं झायादीम्ह येँ मनपा १२ वडाया अध्यक्ष वय्कलं थुगु थाय्यात चलायमान यायेगु निंतिं जेष्ठ नागरिक दिवा सेवा केन्द्र स्थापना यानाः १२ वडा दुनेया जेष्ठ नागरिकपिन्त मनोरञ्जनलिसें भजन, बाखं कनेगु नं यायेगु लिसें थुगु केन्द्रया स्थापना उलेज्या जुइवं निगूगु वालय् जलपानया व्यवस्था यानाः सेवा बीगु कुतः दुगु खँ नं कनादिल ।
ज्याझ्वलय् नुगः खँ तयादिसें येँमपा १२ वडाया वडा दुजः पुष्प रत्न प्रजापतिं १२ वडायात हे नमुनाया केन्द्र दयेकेत ताःलाःम्ह स्व. चक्रमान डंगोलयात झीसं ल्वःमंके मज्यू धयादिसें वय्कःया योगदानया कदर यासें चक्रमान डंगोलया आर्धकदया सालिक खोल्चापाखा परिसरय् तयेगु योजना दुगु व याकनं हे पूवंकेगु खँ तयादिल ।
ज्याझ्वलय् येँ मपा १२ वडा दुजः नानीहेरा डंगोल, नारायण परिवार क्लवया नायः प्रचण्डमान बज्राचार्य, ब्रम्ह स्पोर्टस् क्लवया नायः सगुनमान श्रेष्ठ, ज्यापु महागुथि येँ महानगर समितिया नायः पंचनारायण महर्जन, ज्याप्ु संस्कृति विकास कोषया नायः मंगलकृष्ण सिं, बुद्धमाइ फाउण्डेशनया नायः दिपक सिंयालिसें सल्लाहकारपिं सन्त कुमार महर्जन व निर्मला शाक्यया ब्वति दुगु खः ।
ज्याझ्वलय् न्याद्वःस्वयां अप्वः आर्थिक ग्वाहालि यानादीपिं व्यक्ति व संघसंस्थायात मतिनाया चिं लःल्हाःगु खःसा आजीवन दुजःपिन्त दसिपौ नं लःल्हाःगु खः ।
महिला बौद्ध समुहया नायः श्रीमिला सुवालं च्वःगु म्येया म्यूजिकभिडियो नं छायाङ्कन याःगु खः ।
समूहया नायः श्रीमिला सुवालया सभापतित्वय् जूगु ज्याझ्वलय् सह–सचिव मन्जु प्रजापतिं लसकुस, मिसा लिधंसा पुचःया नायः व समुहया न्वकु गंगा देवी डंगोलं सुभाय् देछाःगु खःसा ज्याझ्वः समुहया छ्याञ्जे सुनिता महर्जनं न्ह्याकादीगु खः ।