येँ मनपा २३ वडाय् च्वंगु जाेर गणेश सामुदायिक सिकाइ केन्द्रया ग्वसालय् जूगु अबाकस तालिम व फाेटाेग्राफी तालिमय् ब्वति काःपिंत थाैं छगू ज्याझ्वः यासें दसिपाै लःल्हाःगु दु ।
येँ मनपाया उपप्रमुख सुनिता डंगाेलया मूपाहाँसुइ जूगु ज्याझ्वलय् नुगःखँ तयादिसें मय्जु डंगाेलं अबाकस तालिमं मस्तय्गु कल्पना क्षमता अप्वयेकीगु जूगुलिं थुकियात निरन्तर छ्यलेत इनाप यानादिल ।
वय्कलं येँ मनपापाखें हनुमानढाेका दरवार लागाया जानकारीमूलक क्यूआर काेड तयागु इलय् फाेटाेग्राफी तालिमय् ब्वति कयाच्वनादीपिं स्यनामिपिनि ब्वतिं ज्याझ्वः हे झःझः धाःगु लुमंकादिल । फाेटाेग्राफी व अबाकस तालिमया स्यनामिपिन्त थःपिसं सयेकागु शीपयात निरन्तर छ्यलेत इनाप यानादिसें मय्जु डंगाेलं सयेकागु शीप निरन्तर छ्यल धाःसा जक उकिया औचित्य दइ धयादिल ।
ज्याझ्वलय् विशेष पाहाँ येँ मनपा २३ वडाया नायः मचाराजा महर्जनं शैक्षिक विकासया निंतिं थुज्वःगु ज्याझ्वः न्ह्याकेगु निंतिं येँ मनपाया प्रत्येक वडाय् सिएलसि (सामुदायिक सिकाइ केन्द्र) स्वनातःगु जूसां उकिया बजेट निकासा मजुयाः स्यनेकनेज्याय् लिच्वः लानाच्वंगु खँ कनादिल । वय्कलं येँ मनपापाखें २०८०/८१या निंतिं प्रत्येक सिएलसियात ५ लाखया बजेट विनियाेजन जूसां उकिया कार्यान्वयन मजूगु खँय् शिक्षा तथा स्वास्थ्य समितिया कजि येँ मनपा २२ वडाया नायः चिनीकाजी महर्जनया ध्यानाकर्षण याकादिल । लिसें वय्कलं वडाया विकासया निंतिं विनियाेजित ध्यबा मध्ये भाैतिक पूर्वाधारया जक मखु वडाबासीया आर्थिक विकासया निंतिं नं छ्यलेगु खँ तयादिल । वडाबासीपिनि क्षमता विकास व आर्थिक विकास नं विकासया महत्वपूर्ण पक्ष जूगु वय्कलं कनादिल ।
विशेष पाहाँकथं ज्याझ्वलय् ब्वति कयादीम्ह येँ मनपा २२ वडाया नायः महर्जनं सिएलसिया ध्यबा छु हुनिं निकासा मजूगु खः थःपिसं न्यनेकने यानाः फयाफछि याकनं ध्यबा निकासा याकेत पहल यायेगु खँ कनादिल । अबाकस व फाेटाेग्राफी तालिम कयादीपिन्त भिंतुना देछासें तालिमया सही सदुपयाेग यायेत वय्कलं इनाप यानादिल ।
ज्याझ्वलय् वरिष्ठ फाेटाेग्राफर राजभाइ सुवाल, नेवाः देय् दबूया नायः पवित्र बज्राचार्य, फाेटाेग्राफी प्रशिक्षकपिं झक्कु राेक्का, ओमलाल ताम्राकार, विक्रम न्याैपाने, यूश डंगाेल, अबाकस तालिमया प्रशिक्षक प्रमिला महर्जन पाहाँकथं झायादीगु खः ।
जाेरगणेश सामुदायिक अध्ययन केन्द्रया नायः सजनी महर्जनया सभापतित्वय् जूगु ज्याझ्वलय् फाेटाेग्राफी तालिमया कजि सानुकाजी महर्जन, ल्यूकजि रिता महर्जन, अबाकस तालिमया कजि सपना शाहीपिसं थःपिनि नुगःखँ तयादीगु खः ।
फाेटाेग्राफी तालिमय् २१ जना व अबाकस तालिमय् १८ जना मस्तय्सं ब्वति काःगु खः ।
फाेटाेग्राफी तालिम काःम्ह स्यनामि रजिन महर्जनं तालिम कयागु इलय् व फिल्डय् वनाः ज्या यानागु इलय् जूगु अनुभव कनादीगु खः ।
ज्याझ्वः अञ्जु बज्राचार्यं न्ह्याकूगु खः ।