नेवाः भाय् व तामाङ्ग भाय् बागमति प्रदेश सरकारं कामकाजी भाय् यानाः छ्येले त्यंगु लसताय् देँय्या थिथि थासय् हर्षोउल्लास कथं न्याका च्वंगु दु । नेवाः देय् दबू येँ जिल्लां व नेपाल तामाङ्ग घेदुङ्ग काठमाण्डौ जिल्लाया संयुक्त ग्वसालय् स्वयम्भु भगवान पाउँलय् मत च्याका भिन्तुना कालविल यागु दु ।
नेवाः देय् दबुया केन्द्रिय नायः पवित्र बज्राचार्य, बागमती प्रदेशसभाया दुजः समिता खड्गी श्रेष्ठ, येँ मनपा १५ वडाया नायः इश्वरमान डंगाेल व नेपाल तामाङ्ग घेदुङ्गया सघीय सदस्य नापं जिल्ला ईन्चार्ज सूर्य मान तामाङ्ग नेवाः देय् दबूया येँ जिल्लाया नायः धन बहादुर तिमिला व नेपाल तामाङ्ग घेदुङ्ग काठमाण्डौ जिल्लाया नायः राजु लामा वाइवा देवाः व पाल्चा च्याका ज्याझ्वः न्ह्याकुगु खः । नेपालया नक्सा दुने नेवाः व तामाङ्ग भाषां लसकुस च्वयाः तगुलि सकल नेवाः देय् दबु व नेपाल तामाङ्ग घेदुङ्गया सदस्य पिन्सं मत च्याकुगु खः । थथेहे देँय्या यक्व थासय् मत च्याकेगु नाप नापं थिथि ज्याझ्वः यानाः भिन्तुना कालविल यागु खः ।