वांङ्गमय शताब्दिपुरूष लोकसाहित्यविद् डा. सत्यमोहन जोशीया १०५ दॅया जन्मजयन्तिया झ्वलय् लोक साहित्य परिषदया ग्वसालय् छवाः यंक्क थीथी ज्याझ्वः याना आइतबार ज्याझ्वःयात क्वचायेकुगु दु ।
छवाः यंक्कया ज्याझ्वःया खुन्हू न्हि खुनु सत्यमोहन जोशी मार्गं साइकल ऱ्याली न्ह्याःगु खःसा उगु र्यालि माननीय प्रेम महर्जन पाखें उलेज्या यानादीगु खः ।
आइतबार शताब्दि पुरुषया छेँय् सत्यमोहन लोक साहित्य भजनया परिसरय् जूगु १०५ क्वःगु जन्म जयन्ती समापन ज्याझ्वलय् बागमति प्रदेशया संस्कृति , पर्यटन व सहकारी मन्त्री माननीय शैलेन्द्र बज्राचार्य मूपाहाँ कथं झायादीगु खः । मूपाहाँ माननीय बज्राचार्यं थःगु नुगःखँ तयेगु झ्वलय् राजनीति धइगु राज्यया नीतिलिसे स्वापु दूगु खँग्वः धका धासे झीगु राज्यय् नं सकतां खँलिसे स्वापु दुगु नीति दु तर उकियाबारे आपासिनं मसिउ धका धयादिल । वयकलं राज्यं देयया लोक साहित्य व संस्कृति लिसे स्वापु दूगु नीति नं दयेकातःगु दु धका धासे वहे नीतिया लिधंसाय् लोक साहित्य व संस्कृति या थपु जुइगु ज्याय् थःम्हं फक्वः ग्वाहालि याये धका कयादिल ।
ज्याझ्वलय् नेपाल व चीनया निगुलिं मोहदां सगरमाथा आरोहण याना कीर्तिमानी ज्या यानादीम्ह कल्पना महर्जन यात वयकलं सगरमाथा या च्वकाय् शताब्दि पुरुषया किपा थ्यंका ज्वमदुगु ज्या यानादीगुलिं हना देछागु खः ।
अथेहेतुं ज्याझ्वलय् अष्ट गणेश अनुसन्धान केन्द्रपाखें पिकागु मल्ल के सुन्दरया” लुमन्तिया किचः ” , विजयरत्न असंबरे या ” संकिपाया न्हायकं ” , कृष्णप्यारी श्रेष्ठया ” बोदेया नीलबाराही द्यःगं नकेगु परम्परा ” , ईश्वरी मैंया श्रेष्ठया ” नेपालभाषाया पद्यया किचः ” व धर्मकृष्ण श्रेष्ठया ” थिमिया स्यस्यः बिनां ” नांयागु न्यागु सफूया नापनापं लोक साहित्य परिषदपाखें पिदंगु अणुराज जोशीया ” महाकाव्य ख्यः व शताब्दि अभिनन्दन ” सफूया नं पितब्वज्या जूगु खः ।
लोक साहित्य परिषदया नायः राजित बहादुर श्रेष्ठया सभानायसुइ जूगु उगु ज्याझ्वलय् सफू च्वमिपिं अणुराज जोशी व विजयरत्न असंबरे पिन्सं थःथःगु सफूबारे खँ तयादीगु खःसा ज्याझ्वलय् पाहाँ कथं नेपालभाषा मंका खलः यलया नायः हिराकाजी महर्जन या विशेष उपस्थिति दूगु खः ।