किलाघः त्वाः खलःया ग्वसालय् किलाघःया दाजुकिजापिं दथुइ थवं थः म्हसीकेगु ज्याझ्वः बैशाख ८ गते 
शनिवाः क्वचाःगु दु । किलाघः त्वाःया जः यक्वः दुगुलिं त्वालय् तःधिकःम्ह काय् छम्ह जक छेँया प्रतिनिधि कथं त्वालय् दुहाँ वनेगु परम्परा दुगुलिं मेपिं काय्मस्त म्हसिकेत थाकुगु हुनिं काय्मस्त थवं थः म्हसीकेगु नापं त्वालय् दछियंक न्ह्याइगु नखः चखः, विधि व्यवहारयात कालबिल याय्त काय्मस्त ब्वति काय्केगु लागिं थ्व ज्याझ्वः जूगु ग्वसाःखलकं धाःगु दु ।
येँया नेपाः ब्यांक्वेटय् जूगु ज्याझ्वलय् थ्यंमथ्यं त्वाःया न्यासःम्ह दाजुकिजापिनिगु उपस्थित दुगु खः ।
किलाघः त्वाःया नायः बंशीकृष्ण डंगोलया सभापतित्वय् जूगु ज्याझ्वलय् लसकुस त्वाःया कजि नरेन्द्र महर्जनं यानादीगु खः । अथेहे दछि यकं त्वालय् जुइगु ज्याया बारे दुग्यंक खँ त्वाःया धिमे गुरु मचाकाजि महर्जनं कनादिगु खः ।
त्वाःया सकल काय्मस्तय्त थःगु म्हसिका विइका म्हसिकेगु ज्या जूगु थुगु ज्याझ्वलय् त्वाःया थीथी कवःया प्रतिनिधि नापं नायः गुरु कजिपिनिगु उपस्थिति दुगु खः ।
