श्री हल्चोक आकाश भैरव समाजया ग्वसालय् बागमती प्रदेशया न्हूू नियुक्त उद्योग वाणिज्य भूमि तथा प्रशासन मन्त्री मा. प्रकाश श्रेष्ठयात भिंतुना देछात ।
समाजया नायः शेरबहादुर पुतुवारया सभापतित्वय् जूगु ज्याझ्वलय् नुगः खँ तयादिसेंं प्रकाश श्रेष्ठ पार्टीया जक मखु समाजया हे मनू जूगु तायेकाः निर्वाचित यानादीगुलिं सुभाय् देछानादिल । युवातय्त विदेश पलायन जुइगु पनेत उद्योग नीति हयेगु, कृषि विकासया निंतिं बाझो जुयाच्वंगु भूमियात छ्यलेगु निंतिं ज्या न्ह्याकेगु खँ तयादिल ।
समजपाखें बागमती प्रदेशयाके फ्वंकथंया बजेट ब्यवस्थापन यायेत थम्हं फुचाःकथं ग्वाहालि यायेगु लिसें मागया सम्बन्धय् संस्कृति पर्यटन तथा सहकारी मन्त्रालयलिसे समन्वय यानाः प्रस्ताव तयेगु खँ तयादिल ।
थनया जीर्ण सम्पदा पुनःनिर्माण यायेमाःगु दुसा थःपिं ग्वाहालि यायेत तयार दुगु खँ तयादिसें थुकिया निंतिं पुरातत्त्व विभाग, स्थानीय निकायलिसे समन्वय यानाः ज्या न्ह्याकेगु खँ तयादिल ।
समाजया न्वकु जीवन पुतुवारं लसकुस यासें स्वनिगः भैरवपिसं रक्षा यानावयाच्वंगगु खँ न्ह्यथसें हल्चोक आकाश भैरव मवंकं येँयाः मन्ह्याइगु खँ कनादिल । वय्कलं दच्छियंकं हल्चोक आकाश भैरवयाथाय् जुइगु थीथी ज्याया नं जानकारी बियादिल । वय्कलं वइगु २०८२ साल बैशाखं हल्चोक आकाश भैरवया झिंनिदँया जात्रा न्ह्याइगु व उकी यक्व हे खर्च माःगुलिं सकसियांपाखें ग्वाहालिया निंतिं इनाप यानादिल ।
ज्याझ्वलय् नुगःखँ तयादिसें श्री हल्चोक आकाश भैरव गुठीया नायः सागर पुतुवारं मन्त्री श्रेष्ठया सफल कार्यकालया कामना यानादिल । वय्कलं मन्त्री श्रेष्ठं हल्चोक आकाश भैरवया सेवा यानावयाच्वंगु लुमंकादिल । हल्चोक आकाश भैरव सरकारी निकायपाखें उपेक्षाय् लानाच्वंगु खँ कनादिल ।
वय्कलं झिंनिदँया जात्राया निंतिं प्रदेश सरकारपाखें ग्यसुलाक्क आर्थिक ग्वाहालिया निंतिं इनाप यानादीगु खः ।
मा. प्रकाश श्रेष्ठया पहलय् आकाशभैरव लिक्क च्वंगु सतः १करोड १५ लाख बजेट तयाः दयेके ज्या जुयाच्वंगु खँ कनादिल ।
ज्याझ्वलय् नुगः खँ तयादिसें समाजया नायः शेरबहादुर पुतुवारं मन्त्री श्रेष्ठं बचं बियादीकथं ज्या याइगु भलसा कयादिल ।
ज्याझ्वः समाजया ल्यूछ्याञ्जे शुक्र पुतुवारं न्ह्याकूगु खः