जनगायकया पदवीं हनाबना तयातःम्ह नेपाःया वरिष्ठ गायक कलाकार भृगुराम श्रेष्ठया अन्तिम संस्कार थाैं पशुपति आर्यघाटय् क्वचाल । नेपालभाषाया सलंसः म्येय् सः बियादीम्ह जनगायक श्रेष्ठ वासः याकुयाकुं हे म्हिगः सनिलय् मदुगु खः ।
वय्कःया पार्थिव शरीरय् वय्कःया काय् जविन राम श्रेष्ठं मि तःगु खः ।
नेवाः देय् दबूया संयोजनय् पशुपति र्आयघाटय् हे छगू बहःचाधंगु श्रद्धाञ्जली सभाया ग्वसाः ग्वयाः जनगायक श्रेष्ठयात लुमंकूगु खः । जनकवि दुर्गालाल श्रेष्ठं पार्थिव शरीरय् खादागा देछानाः श्रद्धाञ्जली देछानादीगु खः । थः स्वयम् नं स्वास्थ्य बांमलाःगु हुनिं याकनं हे वय्कः लिहाँ झाया दीगु खः ।
श्रद्धाञ्जली देछा ज्याझ्वलय् नुगःखँ तयादिसें नेवाः न्ह्यलुवा मल्ल के सुन्दरं जनगायक भृगुराम श्रेष्ठ थुज्वःम्ह व्यक्तित्व सलंसः दँय् छक्वः जक जन्मे जुइ धयादिल ।
ज्याझ्वलय् नेपाल संवत् न्हूदँ राष्ट्रिय समारोह समितिया नायः प्रा.डा. नरेशमान बज्राचार्यं दुर्गति परिशोधन पाठ यानाः जनगायक श्रेष्ठया सुगतिया कामना यानादीगु खःसा चारुमति विहारया भिक्षु तपस्सिं नं थेरवादकथं वय्कःया सुगतिया कामना यानादीगु खः।
जनगायक श्रेष्ठयात अन्तिम श्रद्धाञ्जली देछायेत नेवाः देय् दबूया नायः पवित्र बज्राचार्य, ख्यालि जुजु मदनकृष्ण श्रेष्ठ, वरिष्ठ कलाकार गणेश साय्मि, हलिं नेवाः दबूया नायः सुरेन्द्रभक्त श्रेष्ठ, लोककवि राजभाइ जकःमि, वरिष्ठ संगीतकार वीरप्रसाद भन्साली, अमर राजाेपाध्याय, बदन शर्मा, नेपाल प्रज्ञा प्रतिष्ठानया प्राज्ञ अगिव बनेपाली, नेपाल लिपि गुथिया नायः अनिल स्थापित, ज्यापु महागुथि नेपाः येँ जिल्ला समितिया नायः पञ्चनारायण महर्जन, नेपाल रेडक्रस साेसाइटी गणबहाल उपशाखाया नायः अमृत मानन्धर, रेडियाे नेपालया संगीत निर्देशक मनराजा नकःमि लिसेंया नेवाः ख्यःया व्यक्तित्वपिनि उपस्थिति दुगु खः।
थुकथं हे वय्कःयात श्रद्धाञ्जली देछायेगु निंतिं पूर्वमन्त्री हितमान शाक्य, राजेन्द्र प्रसाद श्रेष्ठ, दिलिप महर्जन, बागमति प्रदेशया सांसद मा. समिता खड्गी, मा. देवेन्द्र श्रेष्ठ, राष्ट्रिय भूमि आयाेग काठमाडाैं जिल्लाया नायः श्यामकृष्ण प्रजापति, येँ महानगरपालिकाया उपमेयर सुनिता डंगाेल लिसेंया राजनीतिक व्यक्तित्वपिनि नं ब्वति दुगु खः ।
जनगायक श्रेष्ठया जविन राम व रविन राम निम्ह काय् दु । वय्कः काय् जविनराम व भाैलिसें निम्ह छय्पिनिलिसे च्वनाच्वनादीगु खः।