त्यंगः त्वाः मिसा पुचःया दँमुज्या क्वचाल

न्हिंल्या ने. सं. ११४३ अनलाथ्व एकादशी २०८० साउन १३ गते शनिवाः त्यंगः त्वाः मिसा पुचःया दँमुज्या क्वचाल । पुचःया अध्यक्ष नानीहिरा महर्जनया अध्यक्षताय् न्ह्याकुगु उगु ज्याझ्वःया मूपाहा त्यंगः त्वाःया नायः धनबहादुर “तिमिला“ महर्जनजु झायादीगु खः । अथेहे पाहाँ कथं त्यंगः त्वाःया न्याम्ह थाकुलि छसिंकथं तिर्थ नारायण महर्जन, देबनारायण महर्जन, कृष्णनारायण महर्जन, पंचनारायण महर्जन व तिर्थ महर्जन नापं त्वाःया गुरु धर्मरत्न महर्जन, निबर्तमान नायः कूलबहादुर महर्जन व त्यंगः त्वाः लाय्म्ह पुचःया नायः राजिव डंगोलजु पाहाँकथं झायादीगु खः ।
ईकथं न्हूगु तरीकां सक्व रिसोर्टय् न्ह्याकुगु दँमुज्या मूपाहाँ धनबहादुर महर्जनजुं त्वाः देवाय् मत च्याका उलेज्या यानादीगु खःसा मिसा पुचःया थीथी इलय् जूगु ज्याझ्वलय् ग्वाहालि याना यानादिपिं नानीकाजि महर्जन, बालकृष्ण महर्जन, मणिकण्ठ महर्जन, पुष्प महर्जन व राजिप डंगोलजुयात खादां न्ययेका सम्मान याःगु खः ।
ज्याझ्वलय् ल्यूछाञ्जे सुमित्रा महर्जनजुं प्रगति प्रतिवेदन न्ह्यब्वयादीगुसा आर्थीक प्रतिवेदन दाँभरी मैयाँ महर्जनजुं न्ह्यब्वयादीगु खः ।
सभाध्यक्ष मयजु नानीहिरा महर्जनजु पाखेँ थःगु मन्तब्यय् आ वइगु नेसं ११४४ या ज्यापुदिवस भब्य कथं हनेत त्वाःया सकल म्ह्यायमचातयगु भेला यानाः संस्कार संस्कृतिया बारे गहन सहलह ब्याकाः वनेगु खं कनादीगु दु ।
ज्याझ्व मिसा पुचःया छ्याञ्जे सरीता महर्जनं न्ह्याकुगुसा ल्यूदाँभरी पुनम महर्जनजुं लसकुस न्वचू तयादीगु व दुजः लक्ष्मी महर्जनजुं सुभाय् बियादीगु खः ।