किलाघः त्वाः मिसा पुचःया खुक्वःगु दँमुज्या क्वचाल

किलाघः त्वाःया मिसात छथाय् हय्गु तातुनाः नीस्वंगु किलाघः त्वाः मिसा पुचःया खुक्वगु दँमुज्या वंगु आइतवाःर मच्छेनारायण द्यःथाय् गुँभ्वय् नापं क्वचाल ।
थुगु ज्याझ्वलय् मूपाहाँकथं झायादीम्ह कामपा १८ वडाया अध्यक्ष न्हुच्छेकाजी महर्जनं मिसा व मिजं छगू रथया निगु पांग्रा जुयाः न्ह्याःवनेमाः धयादिल । अथेहे थुगु पुचःयात धिसिलाकेगु खःसा पुचलय् बांलाःगु ज्यायात च्वछाय्माःगु व बांमलाःगु ज्यायात कुंखिने माः धयादिल । थथे याय्फत धाःसा जक पुचः धिसिलाना वनी । पुचलय् च्वने धुंकाः रंगरोगन याय् थें जक थःगु उपस्थिति मक्यँसें दुनंनिसें हे धिसिलाकेत थःपिं न्ह्यज्याना वने माः धयादिल ।
अथेहे किलाघः त्वाःया नायः वंशिकृष्ण डंगोलं भौमस्त छथाय् हयाः त्वाःया इज्जत तय्गु ज्या यानाच्वंगु मिसा पुचलं लिपा नं त्वाःया ज्याझ्वलय् ग्वाहालि बिइगु नापं धिसिलाःगु ज्या याना वनी धैगु विश्वास दुगु खँ कनादिल ।
अथेहे किलाघः त्वाःया कजि नरेन्द्र महर्जनं संस्था बल्लाकेत नेतृत्व हिला वन धाःसा न्हू न्हू ज्या दुथ्याके फइ धकाः धैदिल ।
ज्याझ्वलय् प्रतिवेदन व भावी ज्याझ्वः न्ह्यब्वय्गु झ्वलय् पुचःया नायः हेराशोभा महर्जनं पुचलं याना वःगु ज्या कनादिल सा भावि ज्याझ्वलय् थुगु पुचलं इहि याय्गु व लुम्विनी भ्रमण यंकेगु ग्वसा ग्वयागु दु नापं याकनं हे न्हुगु नेतृत्व पुचलं खनी धैदिल ।
ज्याझ्वलय् मूपाहाँ कथं १८ वडाया अध्यक्ष न्हुछेकाजी महर्जन पाहाँकथं किलाघः त्वाःया नायः वंशीकृष्ण डंगोल, मू गुरु लक्ष्मी नारायण महर्जन, गुरु मोहन कृष्ण महर्जन, कजि नरेन्द्र महर्जन व १८ वडाया सदस्य हेमरत्न शाक्य झाःगु खः ।
थुगु ज्याझ्वलय् लसकुस न्वचु पुचःया ल्यू नायः विष्णुदेवी महर्जन अथेहे सुभाय् न्वचु दुज मन्जु महर्जनं व ज्याझ्वः छ्याञ्जे सुनिता महर्जनं न्ह्याकादीगु खः ।