नेवाः समुदायया ज्याझ्वःयात जनमानस हयत निस्वंगु नेवाः सुचना केन्द्रया खुक्वगु दँमुज्या ॐ बहालया सूर्यमुन रेष्टुरेन्टय् वंगु शुक्रवा क्वचागु दु । थुगु केन्द्रं नेवाः समुदायया ज्याझ्वःयात लाइभ प्रशारण यानावयाच्वंगु दु । गुकिं यानाः देश विदेशय् च्वंपिं नेवाः समुदायपिन्सं सेवा कया वयाच्वंगु दु ।
ज्याझ्वलय् मुपाहाँ कथं राससया नायब महाप्रबन्धक राजु शाक्यं राससं बियाच्वंगु बुं खँ नेपाः न्यकंया सुचं कघानाच्वंगु दु सा व वुखँ याना सकल नेपाःपिन्सं सुचं ब्वने फयाच्वंगु जिकिर यासें राससया भावि लक्ष्य नेपाल भाषा व मैथलि भाषायात प्राथमिकता विइगु कोशिश जुयाच्वंगु जानकारी बियादिल । वयकलं सूचना केन्द्रं यानाच्वंगु ज्यायात कदर यानाः थुकियात आर्थिक रुपं बल्लाकेत सकलसिन ग्वाहालि याय्मागु धयादिल ।
नेवाः सुचना केन्द्रं नेवाः समुदायया ज्याझ्वः लाइभ प्रशारण यानाः सुचं प्रवाहयाय्त टेवाः वियाच्वंगु दु धासें थुगु केन्द्रं लिपाझन अप्व प्रगति यानाः नेवाः समुदायया हकहितयात टेवा बिइ फयेमा हलिं नेवाः दबु नेपाल च्याप्टर नायः सुरेन्द्र भक्त श्रेष्ठं थुगु खँ तय्गु झ्वलय् खँ तयादिगु खः ।
मेम्ह पाहाँ न्हुदँ राष्ट्रिय समारोह समिति ११४३ या नायः नरेश बज्राचार्यनं थुगु केन्द्रया प्रचार प्रशारं नेवाः समुदाययात जक मखुे झिपिं थें ओझेलय् लानाच्वंपिं समुदायपिनि न्ह्यःने हय्त तिवः बिउगु दु लिपा वनाः थ्वं नेवाः समुदाय जगेर्ना याय्त दसु जुइगु धयादिल ।
अथेहे वरिष्ठ पत्रकार सुरेश किरण मानन्धरं नेवाः सुचना केन्द्रं यानाच्वंगु ज्या झीसं सुरक्षित याय्फत धासा इतिहास दुवालिपिन्त तिव जुइगु नापं ज्याझ्वः लाइभ यानातगु भिडियो त अर्काइभ याय् फत धासा म्वानाच्वंपिं जक मखु झी नापं तापाना वनिधुंकुपिंंनि तकं अध्ययन याय्माल धासा थ्व छगु बालांगु मजिमगागु श्रोत जुइधका धयादिल ।
सुचना केन्द्रया नायः रमिता बज्राचार्यया सभानायःसुइ जुगु उगु ज्याझ्वलय् थिथि नेवाः समुदाययात मतिना याइपिं व्यक्तित्व पिन्त लुमेकेगु ज्या नं यागु खः ।