इन्द्रजात्राया बिषयसं खँ व्याकेत सिक्किम सरकारया मुख्यमन्त्रीया जनसम्पर्क अधिकारी लिसें सिक्किम नेवाः गुथिया पदाधिकारी येँ भ्रमण

सिक्किम सरकारया मुख्यमन्त्री प्रेमसिंह तामाङया जनसम्पर्क अधिकारी रत्नमणि प्रधान येँ थ्यंकझाःगु दु । वय्कःनापं मुख्यमन्त्रीया ज्याकूया मेपिं अधिकारीपिं नं झाःगु खः । सिक्किमय् हनावयाच्वंगु येँया इन्द्रजात्रा या बिषयसं जात्रायात अझ भब्यरुपं न्हयाकेत छु गथे यायेफइ व यायेमालिइ धैगु बिषय नापं निगू देय् दथुइया सांस्कृतिक सम्वन्धयात गुकथं सुमधुर यानायंके फइ धैगु बिषयसं सहलह यायेत येँ झाःगु खः । सिक्किम नेवाः गुथिया नायः निर्मल कुमार प्रधानया नेतृत्वय् गुथिया पदाधिकारी दुजः सहित येँ थ्यंकवःम्ह रत्नमणि प्रधान नापंया प्रतिनिधिपिन्सं येँया इन्द्रजात्रा ब्यवस्थापन समितिनाप सहलह याःगु खः । येँया द्वारिका छेँ बागमती प्रदेश सांसद शैलेन्द्र बज्राचार्यया मू पाहाँसुइ न्ह््याःगु सहलह ज्याझ्वलय् समितिया नायः गौतमरत्न शाक्य नापंया पदाधिकारी व जात्रानाप स्वापू दूगु गुथिया प्रतिनिधितय्गु नं ब्वति दुगु खः ।
ज्याझ्वलय् मू पाहाँ बज्राचार्यं झी नेवाःत भौगोलिक रुपं न्हयाथाय् च्वंसां थःगु कला, संस्कृति, संस्कार संरक्षण संवद्र्धन यायते व थुकियात निरन्तरता बिइत लिचिले मज्यूगु धयादिल । वय्कलं नेवाःत न्हयाथाय् च्वंसां पूर्खौली थाय् नेपालमण्डल हे जूगुलिं सुना नं नेवाः मखु धायेमफइगु धयादिसें थःथःगु थासं संस्कृति सम्वद्र्धनय् तिवः बिइत इनाप यानादिल ।
ज्याझ्वलय् सिक्किम सरकारया मुख्यमन्त्री प्रेमसिंह तामाङया पाखें इन्द्रजात्रा ब्यवस्थापन समितियात व इन्द्रजात्रा ब्यवस्थापन समिति पाखें सिक्किम सरकारयात मतिनाया चिं लःल्हायेगु ज्या जूगु खः ।
सहलह लिपा सिक्किम सरकारया प्रतिनिधि व सिक्किम नेवाः गुथिया पदाधिकारी दुजःपिन्सं बसन्तपुर स्थित राजकीय कुमारीया दर्शन याःगु खः ।