संसारया न्ह्याग्गु हे धर्म थमजुइमा धर्मया ख्यलय् दानया तःधंगु महत्व दयाच्वंगु दइ । उकिसनं बौद्ध धर्मय् दान यात विशेष प्राथमिकता बिया तःगु दु । थ्वहे खँ यात मनन् यासे येँया शाक्य महाविहार संघया ग्वसालय् पंचबुद्धया प्रतिककथं श्रद्धेय स्थविर थाय्पा आजूपिन्त येँया श्री गणेश व श्री भैरवया समुपस्थितिइ लगं गोफःया यत बहालय् ( कीर्तिपुण्य भुवन सुन्दर महाविहार ) पंचदान या ज्याझ्वः याःगु दु । ने सं ११४३ तछलाथ्व ज्याःपुन्हिया लसताय् थथे आइतवाः कुन्हु पन्चदान याःगु खः ।
श्री दीपंकर तथागत समक्ष पुजाआजा याना थुगु पंचदान ज्याझ्वः न्ह्याकुगु याःगु खः । उगु ज्याझ्वलय् लायकूया श्री कुमारीयात दान प्रदानया झ्वलय् भाग तयाः वसपोलयात तकं सम्मानया ज्या याःगु खः ।
येँ देया शाक्यपिं बन्दे लुइगु (प्रवज्याभिषेक) झिगू बहाःया न्याम्ह न्याम्ह याना मुक्कं न्ययम्ह (५०) श्रद्धेय थाय्पा वा बहाःया प्रतिनिधिपिन्त बज्रयानी विधि विधानकथं पंज्ररां बिउगु खः । संघया मूछ्याञ्जे संघरत्न शाक्यं धयादी कथं यत बहाःया जःपिं व थीथी बहाःया आपालं दुजःपिन्सं धर्मचित्त उत्पति याना दान प्रदान यायगु याःगु खः ।
नघःया श्रीशान्तिघट बज्रधातु चैत्य महाविहार (श्रीघः बहाः), नघःया रत्नमण्डप महाविहार (नघः बहाः), असं गल्लीया अशोक चैत्य महाविहार (असं बहाः), महाबूया महाबुद्ध महाविहार (महाबृद्ध बहाः), वतुया धर्मचक्र महाविहार (तःधं बहाः), ओमबहाःया मञ्जुुश्रीनक महाविहार (बिकमा बहाः), यंगाःया धर्माकर महाविहार (स्वः बहाः),कोहितिया कीर्तिपुण्य महाविहार (कोहिति बहाः), ह्यूमतया रत्नाकर महाविहार (क्वंसा बहाः) व
गोफःया कीर्तिपुण्य भुवन सुन्दर महाविहार (यताबहाः) या थायपा अाजूपिंन्सं थथे पंज्ररां फया कागु खः ।
