ग्लोबल नेपाल नेटवर्कया ग्वसालय् नेपालभाषा मनोञ्जन ख्यलय् बिस्कं पहःया सिरपाः नेवाः सुपरस्टार सिरपाः लःल्हायेगु दु । येँया सोल्टी ब्यांक्वेटय् जूगु उगु ज्याझ्वलय् कजि सुरेन्द्र तुलाधरं मनोनित जूपिं झिम्ह हे कलाकारपिं दकले न्हापां जूगु नेवाः सुपरस्टार ज्याझ्वलय् ‘नेवाः सुपरस्टार’ जूगु घोषणा यानादीगु खः ।
सुपरस्टारया धलखय् लापि मिजं कलाकारपिं आर्यम नकःमि, सुरज ब्यञ्जनकार, रुपेन श्रेष्ठ थक्वाःमि, राजु महर्जन व भोगेन्द्र मानन्धरलिसें मिसा कलाकारपिं हिसिला महर्जन, भिन्तुना जोशी, अन्नपूर्णेश्वरी श्रेष्ठ, रोजिना सुवाल व रजनी खड्गी खः । ज्याझ्वलय् मूपाहाँ कथं ख्यालिजुजु मदनकृष्ण श्रेष्ठ झायादीगु खःसा ज्याझ्वलय् ब्वति काःपिन्त ग्लोबल नेपाल नेटवर्कया नायः सुनिलकुमार शाक्यं लसकुस यानादीगु खः । नेवाः सुपरस्टार जूपिन्त हनापौलिसें म्हतिं नीद्वः नीद्वः तका दां लःल्हाःगु खः । उगु ज्याझ्वलय् नांजाःपिं कलाकारलिसें भाषा ख्यःया थीथी व्यक्तिपि येँ महानगरपालिकाया पुलांम्ह मेयर विद्यासुन्दर शाक्य, पूर्व उपप्रमुख नापं प्रदेश सांसद हरिप्रभा खड्गी श्रेष्ठ, संगीतकार न्ह्यू बज्राचार्य, नेवाः देय् दबूया नायः पवित्र बज्राचार्य, पुर्वमन्त्री राजेन्द्र श्रेष्ठ, पुर्वरक्षामन्त्री भीमसेनदास प्रधान, संकिपा समिक्षक प्रकाश सायमिपिनिगु उपस्थिति दूगु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।