“सुलक्षणकीर्ति विहार“या प्रमुख श्रद्धेय अनोजा गुरुमा थौ जेठ ३ दिवंगत जुयाबिज्यात

धर्मकीर्ति विहारया शाखा विहार “सुलक्षणकीर्ति विहार“या प्रमुख श्रद्धेय अनोजा गुरुमां थौं २०८० जेठ ३ गते १ बजे जुया २२ मिनेट वंकाः दिवंगत जुयाबिज्यात । छुं ई न्ह्योनिसें क्यान्सर ल्वचं कयाः म्हंमफयाच्वंम्ह वसपोलयात लिपांगु इलय् मेडिसिटी अस्पतालय् वासः याकातःगु खःसा अनहे वसपोल मदुगु खः ।
बि.सं. २०१७ श्रावण २ गते भ्वतय् जन्म जुयाबिज्याःम्ह वसपोल झिदँया वैशय् भारतया बनारासय् प्रव्रजित जुयाबिज्याःगु खःसा नेपाः लिहाँ बिज्याये धुंकाः त्रिशुलीया सुगतपुर विहार व येँया किम्डोल विहारय संघर्षपूर्ण जीवन यापन यानाबिज्याःम्ह वसपोल लिपा धम्मचारी गुरुमांया पहलय् व धम्मवती गुरुमांया संरक्षणय् धर्मकीर्ती विहारय् च्वनाबिज्याःगु खः। अनं लिपा वसपोलं बर्माया खेमारामपाखें अभिधर्म अध्ययन यानाबिज्यातसा सन् १९९८स भारतया सम्पूर्णानन्द विश्वविद्यालयं अभिधम्मवतर्पुरन्तिक बिषयस विद्यावारीधी क्वचायेकाबिज्याःगु खः।
बुद्ध शिक्षा व बुद्ध शासन चिरस्थायी यायेत थःगु जीवन पानाबिज्याःम्ह वसपोलं सुलक्षणकीर्ति विहार स्थापना यानाबिज्यासे आपालं धर्म प्रचार यानाबिज्याःगु जक मखु, आपालं संस्थाय् सक्रिय जुयाच्वनाबिज्याःगु लुमंकेबहःजू।
मदुम्ह वसपोलयात २०८० जेठ ५ गते शुक्रवार १२ बजे तक उपासक उपासिकापिनि अन्तिम दर्शनया लागी सुलक्षणकीर्ति विहारय् तइगु खँ सीदुगु दु। अले वसपोलया इच्छा कथं शुक्रवार १२ बजे लिपा वसपोलया सीम्ह धुलिखेल मेडिकल अस्पतालयात दान याइगु खँ नं जानकारी प्राप्त जूगु दु।