प्रतिनिधिसभाया न्हापांगु अधिवेशन क्वचाल, विवाद अप्वः, ज्या म्हो

निर्वाचनधुंकाः प्रतिनिधि सभाया न्हापांगु अधिवेशन शुक्रवाःनिसें क्वचाल । कार्यवाहक राष्ट्रपति रामसहाय प्रसाद यादवं पौ छ्वयाः सरकारया सिफारिसकथं बैशाख १५ गते शुक्रवाः चान्हसिया १२ तालिपा संसदया निगुलिं सदनया अधिवेशन अन्त्य जूगु घोषणा यानादीगु खः ।
२०७९ पुस २५ निसें न्ह्याःगु न्हापांगु अधिवेशन विधायिकी ज्याय्ु पूर्णतः असफल जूगु दु । न्हापांगु अधिवेशन विवादया चाकलय् तक्यन । अधिवेशनं छगू नं विधेयक पारित याये मफु । सङ्घीय संसदया चालु अधिवेशनं गुगु नं कानुन दयेकेगु ज्यायात पूर्णता बी मफु । राजनीतिक विवादया हुनिं अधिवेशन अन्त्यया जानकारी बीत तकं बाचाई पीमाःगु खः ।
विधि निर्माणय् जक मखु, संसद्प्रति सरकारया जवाफदेहिता, दर्ता प्रस्तावय् सहलह व न्ह्यसःलिसः तकं थुगु अधिवेशनय् जुइ मफुत ।
निर्वाचनलिपा प्रतिनिधि सभाय् स्वंगू व राष्ट्रिय सभाय् छगू विधेयक दर्ता जूगु खः । न्हापांगु अधिवेशनया लिपांगु दिं प्रतिनिधि सभाय् दर्ता जूगु स्वंगुलिं विधेयकय् दफावार सहलहया निंतिं सम्बन्धित समितिइ छ्वःगु दु । कानुनी रिक्तताया हुनिं प्रधानन्यायाधीश सिफारिसया अवस्था मदुसां संवैधानिक परिषद्सम्बन्धी विधेयक पारित यायेत दलत एकमत जुइ मफुत । प्रधानन्यायाधीश सिफारिस जक मखु संसदीय सुनुवाइया निंतिं संयुक्त समिति स्वनेत नं दलत सहमत मजू ।
राष्ट्रिय सभां स्वम्ह दुजः मनोनित याःसां प्रतिनिधि सभाय् प्रक्रिया न्ह्यज्याये मफुत ।
थुकथं हे सङ्क्रमणकालीन न्यायसम्बन्धी विधेयकयात विशेष समितिइ सहलह यायेत छ्वयेगु राजनीतिक सहमति नं सदनपाखें कार्यान्वयन जुइ मफुत । विशेष समिति दयेकेत शीर्ष नेतापिनि दथुइ जूगु सहमति स्वन्हुं हे त्वाःदलेवं विधेयक विषयगत समितिइ हे छ्वःगु दु । लिपांगु बैठकय् प्रतिनिधि सभां राष्ट्रिय सभां पारित जुयाः वःगु खुगू विधेयकयात नं सम्बन्धित समितिइ छ्वःगु दु । सभाय् न्ह्यब्वःगु स्वंगू विधेयक नं विषयगत समितिइ दफावार छलफलया निंतिं छ्वःगु दु ।

बिदासम्बन्धी विवाद

अधिवेशनया लिपांगु बैठकय् सत्तापक्षया हे सांसदपाखें पंगः थंगु दु । प्रमुख विपक्षी दल नेकपा (एमाले)या सांसद लक्ष्मी महतो कोइरीया बिदा स्वीकृत यायेगु कि मयायेगु विवादं अधिवेशन अन्त्यया न्हितकं कार्यसूचीं पूर्णता काय् मफुगु खः । सशस्त्र प्रहरीया असइ थमन विकया हत्या अभियोगय् उच्च अदालत जनकपुरं पुर्पक्षया निंतिं थुनाय् तयेत आदेश जूसां फरार जुयाच्वंम्ह कोइरीं बिदाया निवेदन छ्वयेवं विवाद जूगु खः । सभामुखं कोइरीया बिदा स्वीकृतिया निंतिं सदनय् प्रस्ताव न्ह्यब्वयेवं सत्तापक्षया सांसदं आपत्ति प्वंकूगु खः ।
नेपाली कांग्रेस, नेकपा (माओवादी केन्द्र), राष्ट्रिय स्वतन्त्र पार्टीलगायतं फरार अभियुक्तयात बिरामी माने याये मज्यूगु धासें बिदा स्वीकृत मयायेत माग याःगु खः । कांग्रेसया संसदीय दलया प्रमुख सचेतक रमेश लेखक, सांसद रामहरि खतिवडा, माओवादी केन्द्रया संसदीय दलया प्रमुख सचेतक हितराज पाण्डे, राष्ट्रिय स्वतन्त्र पार्टीया सभापति रवि लामिछानें बिदा स्वीकृत मयायेत माग याःगु खः ।
सभामुख देवराज घिमिरें धाःसा प्रतिनिधि सभा नियमावली २०७९ पारित जुइवं आधिकारिक निकायं छुं नं जानकारी मवःगुलिं निलम्बनया प्रक्रिया न्ह्याके मफइगु कनादीगु खः । प्रहरीं पुस ७ गते कोइरी फरार जूगु जानकारी संसद् सचिवालययात बीधुंकूगु दु तर उगु इलय् प्रतिनिधि सभा नियमावली २०७५ य् फरार जुयाच्वंम्ह अभियुक्तयात निलम्बन याये ज्यूगु अवस्था मदु । चैत १९ गते पारित नियमावलीं फरार जुयाच्वंम्ह सांसद नं निलम्बन जुइगु व्यवस्था याःगु दु । सभाध्यक्ष घिमिरें उगु व्यवस्थाकथं पत्राचार मजूगुलिं निलम्बन याये मफइगु अडान तयादीगु खः ।
राजनीतिक परामर्शलिपा कोइरीया हकय् मेगु अधिवेशनय् निर्णय यायेगु यानाः मनोरमा शेरचन, वर्षमान पुन, चन्द्रकान्त भण्डारी व बिनाकुमारी थनेतया बिरामी बिदा स्वीकृत याःगु दु ।

छु छु ज्या जुल ?

निर्वाचन धुंकाःया न्हापांगु पहिलो अधिवेशनय् राजनीतिक एजेन्डां अप्वः प्राथमिकता काःगु दु । प्रधानमन्त्रीं छगू हे अधिवेशन इलय् निक्वः विश्वासया मत कयादीगु दु सा सभामुख व उपसभामुख ल्यःगु दु । २८ गू बैठकय् प्रतिनिधि सभां मुक्कं ९१ घण्टा ५० मिनेट ज्या याःगु दु ।
अधिवेशन इलय् छक्वः सङ्घीय संसदया संयुक्त मुँज्या च्वंगु दु । निर्वाचनलिपाया न्हापांगु अधिवेशनय् राष्ट्रपतिं सम्बोधन यायेगु निंतिं संयुक्त बैठक सःतूगु खः । चालु अधिवेशनं नियमावली पारित याःगु दु । सभाया अधिवेशन अवधिइ उपप्रधानमन्त्री एवं गृहमन्त्री नारायणकाजी श्रेष्ठ, सञ्चार तथा सूचना प्रविधिमन्त्री रेखा शर्मा, संस्कृति पर्यटन तथा नागरिक उड्डयनमन्त्री सुदन किराती, सङ्घीय मामिला तथा सामान्य प्रशासनमन्त्री अमनलाल मोदीं सार्वजनिक महत्वया विषयस नुगःखँ तयादीगु खः । लिसें भौतिक पूर्वाधार तथा यातायातमन्त्री प्रकाश ज्वाला व भूमि व्यवस्था, सहकारी तथा गरिबी निवारणमन्त्री रञ्जिता श्रेष्ठं आकस्मिक, शून्य लिसें विशेष इलय् ब्वलंगु न्ह्यसःया लिसः बियादीगु खः ।