विसं २०६२/६३ या जनआन्दोलनय् घाःपाः जूम्ह मुकेश कायस्थ वंगु चान्हय् मन्त ।
काभ्रेपलाञ्चोकया बनेपा नगरपालिका–८ य् च्वनाच्वंम्ह वय्कः १५ दँ दुबलय् घाःपाः जूगु खः । घाःपाः जूगु १७ दँलिपा वय्कः मदुगु खः । छुं दिं न्ह्यःनिसें उसाँय् थप स्यनेवं वय्कःयात भ्वँतया शिरमेमोरियल अस्पताल भर्ना याःगु खःसा अन हे वय्कः मदुगु मुकेश फाउण्डेशनया नायः हीरा शर्मां कनादीगु दु ।
जनआन्दोलन जुयाच्वंगु इलय् कायस्थ भ्वँतया हे विद्यासागर स्कुलय् च्यागू तगिमय् ब्वनाच्वंगु खः ।
लोकतन्त्रया निंतिं जनआन्दोलन जुयाच्वंगु इलय् २०६२ चैत २७ गते वय्कःयात भ्वँतया दुवातय् खव न्हकुइ सुरक्षाकःमिया गोली कयाः तच्वकं घाःपाः जूगु खः । उखुन्हुनिसें हे वय्कः हाेसय् मवः । कायस्थया खव ल्हाः बांलाक मन्ह्याःगु खः । गाेलीं कःगु घाः लंसां छ्यनय् तच्वःगु घाः दुगु खः । सुरक्षाकःमिं कयेकूग गाेली कयाः लासाय् लाःम्ह वय्कःयात ‘म्वानाच्वंम्ह सहिद’ धायेगु याइगु खः । गाेलीं कयाः लासा लाये धुंकाः वय्कः लासां गुबलें दने मफुत ।
२०७५ असारनिसें उसाँय् अप्वः स्यंम्ह वय्कःया स्वाथ्योपचार व मेमेगु ज्याया निंतिं कायस्थया नामं प्रतिष्ठान स्वंगु खः । सरकारं वय्कःया वासः खर्च, १५ द्वः तका मासिक भत्ता, छम्ह सुसारेया निंतिं ६ द्वः व निसः तका भत्ता व छम्ह नर्स नियमित उपलब्ध याकावयाच्वंगु खः ।
कायस्थयात २०७८ सालय्र तत्कालीन परराष्ट्रमन्त्री प्रदीप ज्ञवाली संयोजकत्वया लोकतन्त्रया योद्धा, अभिलेखीकरण तथा सम्मान समितिं जनआन्दोलनय् बिउगु योगदानया उच्च मूल्याङ्कन यासें ‘लोकतन्त्रका योद्धा’ सम्मान तकं लःल्हाःगु खः ।
कायस्थ न्यादँ न्ह्यःनिसें गंसि जुजुं वंगु, न्हापा थें न्हिले व न्ववायेगु त्वःतूबलय् वय्कःया परिवारयात पीर थपे जूगु खः । कायस्थ परिवारया याकः काय् खः ।
लिपांगु इलय् मेडिसिटी अस्पतालया चिकित्सक डा गोपाल रमणं कायस्थया उसाँय् स्वयावयाच्वंगु खः । रमणया कथं छ्यनय् जाइगु लः पिहाँ वइगु पाइप इलय्ब्यलय् बन्द जुइबलय् समस्या जुयाच्वंगु खः ।
विसं २०६२/६३ या अनआन्दोलनया झ्वलय् काभे्रपलाञ्चोकया प्यम्ह ल्याय्म्हपिं सीगु खः ।
आन्दोलनय् नालाया भीमसेन दाहालं कास्कीया पोखराय्, पनौतीया सगुन ताम्राकारं येँया कलङ्कीइ, भिमखोरीया शिवहरि कुँवरं भ्वँतय् व नाग्रे गगर्चेया सुनिलकुमार लामां येँया जोरपाटीइ थःपिनि ज्यान त्वःतूगु खः । आन्दोलनय् काभ्रेपलाञ्चोकया ४० म्ह घाःपाः जूगु खः ।