टुकुचाया प्राकृतिक अधिकार पुनःस्थापना याकेत न्ह्याकूगु ज्याय् न्हापांगु चरणया सफलता चूलाःगु येँ महानगरपालिकाया प्रमुख बालेन्द्र शाह (बालेनं) कनादीगु दु । उच्च अदालत पाटनं टुकुचाया बिषयस जूगु फैसलाया पूर्ण पाठयात उधृत यासें प्रमुख शाहं खुसि त्वपुइगु ज्या याये मज्यूगु व मज्यूगु ज्यायात सक्रियतापूर्वक रोकथाम व नियन्त्रण यायेमाः धइगु नीतिकथं न्ह्याकागु गुगुं नं पलाः सितिकं मवंगु कनादीगु दु ।
प्रमुख शाहं धयादीगु दु, ‘छुं दिं न्ह्यः सार्वजनिक जूगु उच्च अदातल पाटनया फैसलाया पूर्णपाठं टुकुचा खुसियात प्राकृतिक स्वरूपय् खुला कायम यायेगु विकल्पयात स्पष्ट रूपय् मान्यता ब्यूगु दु । टुकुचा धः मखु, टुकुचा खुसि हे खः धइगु खँ हाकनं प्रमाणित याःगु दु । खुसिया प्राकृतिक अधिकार व कानुनी व्यक्तित्व जुइ धइगु विधि शास्त्रया, घोषणा याःगु दु ।’
‘अदालतया फैसलां टुकुचा खोला अर्थात् इच्छुमती खुसिया प्राकृतिक अधिकार पुनःस्थापना व संरक्षणया निंतिं येँ महानगरपालिका लगायत संघीय सरकारलिसे स्वापू दुगु निकायतय्गु ध्यानाकर्षण तकं याकूगु दु ।’ प्रमुख शाहं धयादी, ‘गुगुं नं खुसि वा खुसि बाः वनीगु लागा, उकिया जःखः व च्वय्या जग्गा व्यक्ति विशेषया नामय् जुइ मफइगु वैधानिक मापदण्ड दु । तसर्थ, आः टुकुचा खुसिया क्षेत्राधिकार दुनेया व्यक्ति विशेषया नामय् त्रुटीवश कायम जू वंगु जग्गाया कानुनकथं लगत कट्टा यायेगु व थुज्वःगु जग्गा महानगरवासीया सर्वोत्तम हित जुइगु यानाः सार्वजनिक प्रयोजनय् हयेगु सम्बन्धी आवश्यक प्रक्रिया न्ह्यज्याकेगु जुइ ।’
