स्वांयाः पुन्हीया लसता लाकाः थौं ज्यापु संस्कृति विकास कोषया छेँया जग स्वनेज्या येँया यतखा त्वालय् च्वंगु हँय्पूननीइ जूगु दु ।
पूर्वउपप्रधानमन्त्रीलिसें संघीय सांसद प्रकाशमान सिंहया मूपाहाँसुइ जूगु जग स्वनेज्याया झ्वलय् नुगः खँ तयादिसें सांसद सिंहं यतखा त्वाः थः अबू बूगु थाय् जूगु ल्याखं थःगु भावनात्मक स्वापू दुगु थाय् जूगु खँ कनादिल । ज्यापु संस्कृति विकास कोषया भवन दयेकेगु निंतिं कोषया नायः मंगलकृष्ण सिंह, न्वकु सन्तकुमारपिं थःथाय् तारन्ताः झायाः ताकेता यानादीगु खँ कनादिल ।
वय्कलं धयादिल, “झी झी जक धयां मजिल । झी झी जक धायेगु ज्या छुं मजुइगु ज्या याये मजिल । झीगु संस्कृति संरक्षण यायेगु निंतिं गुगु ज्या जुइमाःगु खः व मजुइगु, भाषाया खँय् नं नेवाः मस्त हे नेवाः खँ ल्हाये मसइगु अवस्था जुइधुंकल ।”
वय्कलं आकर्षक नाराया लिउलिउ जक जुइ मज्यूगु खँयात कुलादिसें लोकतन्त्र व प्रजातन्त्रया पलिस्थाया निंतिं योगदान याःपिं व याःगु पार्टीया उपेक्षा याये मज्यूगु खँ तयादिल ।
वय्कलं थः गणेशमान सिंहया काय् जूगुलिं मचांनिसें राजनीतिक संस्कार थुइका वयाच्वनागु व राजनीतिइ थः वये हे चाहे मजुयागु खँ तयादिसें थःम्हं ब्वनाः पाइलट ब्वं वनेत नां पिकयागु जूसां थः वनेत ठिक्क जुयागु इलय् गणेशमानया काय् धकाः नां काटे यानाब्यूगु खँ नं कनादिल ।
वय्कलं नेपाःया संस्कृति सम्पदाया संरक्षण व विकास निर्माणया खँय् राजनीति याये मज्यूगु खँय् नं बः बियादिसें विकास कोषया भवन दयेकेगु निंतिं थम्हं फुगुचाःगु ग्वाहालि यायेगु बचं बियादिल ।
थुकथं हे बागमति प्रदेशया पूर्व संस्कृतिमन्त्रीलिसें सांसद दिपेन्द्र श्रेष्ठं प्रकाशमानसिंहया हे इनाय् चुनाव न्ह्यः हे थुगु भवनया निंतिं बजेट विनियोजन यायेत कुतः यानागु जूसां उबले आचारसंहिताया हुनिं ज्या न्ह्यज्याये मफुगु खँ तयादिल । वय्कलं आः नं थःपिनिपाखें थुगु भवन पूवंकेत थःगु थासं माःकथंया ग्वाहालि यायेगु खँ नं तयादिल ।
कोषया नायः मंगलकृष्ण सिंहया सभानायःसुइ जूगु ज्याझ्वलय् ज्यापु महागुथि नेपाःया नायः लोककवि राजभाइ जकःमि, कोषया संस्थापक संस्था नारायण परिवार क्लबया नायः प्रचण्डमान बज्राचार्य, येँ मनपा २४ वडाया नायः विनोद कुमार राजभण्डारीपिसं नुगःखँ तयादीगु खः ।
ज्याझ्वलय् येँ मनपा १२ वडाया नायः बालकृष्ण महर्जन, १८ वडाया नायः न्हुछेकाजी महर्जन, २३ वडाया नायः मचाराजा महर्जनपिनि नं ब्वति दुगु खः ।
कोषया मूछ्याञ्जे रमेश महर्जनं न्ह्याकूगु ज्याझ्वः न्वकु सन्तकुमार महर्जनं सुभाय् देछासें क्वचाःगु घोषणा यानादीगु खः ।
