मापदण्ड दुगु तर नक्सा स्वीकृत मयासे भवन दय्कूगु न्हय्द्वलं मल्याक निवेदकपिसं येँ महानगरपालिकाय् नक्सा स्वीकृत याकेत निवेदन ब्यूगु दु । प्राप्त निवेदनमध्ये द्वःछि ७३५ म्हेसिया नक्सा पास जूगु दु । ल्यंदुपिं निवेदकपाखें नक्सा दर्ता याकेगु लिसेंया प्रक्रिया न्ह्यानाच्वंगु येँ महानगरं धाःगु दु ।
मापदण्ड दुने लाःगु तर नक्सा पास मयासे दयेकातःगु छेँया नक्सा पेश यायेत ९० न्हुया ई बियाः येँ महानगरं २०७९ भदौ २३ गते सार्वजनिक सूचनापाखें इनाप याःगु खः । सूचनायात लिधंसा माने यानाः नक्सा अद्यावधिक यायेत निवेदन ब्यूगु खः ।
सरकारी, संस्थागत, निजी वा न्ह्यागथु कथंया छेँया नक्सा न्ह्यब्वये फइगु सुचनय् न्ह्यथनातःगु खः । क्वःछिनातःगु इलय् नक्सा पेश मयाःपिनिगु विवरण संकलन यानाः स्थानीय सरकार सञ्चालन ऐन २०७४, भवन संहिता सम्बन्धी प्रचलित व्यवस्था व महानगरया निर्णयकथं कारवाही याय्गु खँ सार्वजनिक इनापय् न्ह्यथनातःगु खः ।
वंगु साउननिसें सहरी विकास विभागं ९६२ गू डीपीसी (ड्याम प्रुृभ कोर्स) स्वीकृत याःगु दुसा द्वःछि ७३५ गू दयेके धुंकूगु प्रमाण पत्र जारी याःगु दु । थ्व इलय् १० द्वः स्क्वायर फिट स्वयां अप्वः क्षेत्रफल दुगु ७२ गू भवनया नक्सा स्वीकृत याःगु दु ।
‘डिजिटल सिग्नेचरलिसेंया इलेक्ट्रोनिक विल्डिङ् परमिट सिस्टम (इबिपीएस) महानगरं नक्सा स्वीकृतिया निंतिं छ्यःगु अनलाइन प्रणाली खः । थ्व प्रणालीयात राजस्व व बैङ्कलिसे लिङ्क याःगु दु ।’ महानगरया सहायक विज्ञ, स्ट्रक्चरल इञ्जिनियर सन्तोष पाण्डें धयादी, ‘भवन संरचनालिसे स्वापूदुगु उजुरी नं थ्व हे प्रणालीए दुथ्याका तयागु दु । जनताया पीर मर्कालिसे सम्बन्धित कानुनी भ्वँत प्रणालीइ अपलोड याये धुंकाः कानुन विभागं प्रणालीपाखें हे कारवाही प्रक्रिया न्ह्यज्याकी । प्रणालीइ नागरिकं थःगु फाइल सुया डेक्सय् थ्यंगु दु । उगु डेक्सय् थ्यंगु गुलि दत धकाः ट्र्याकिङ् यायेफइ ।’
बाँया लागाया अनुपात (फ्लोर एरिया रेसियो — फार) सेट व्याक, प्यपुंगु छेँ, आंशिक निर्माण सम्पन्न, चा परीक्षण, सम्बेदनशील लागा, संस्थागत छेँ, सभा सम्मेलन छेँ, सार्वजनिक छेँ, व्यापारिक छेँ, छेँ दयेकेगुलिसे सम्बन्धित प्राविधिक विषयत खः ।
येँँ महानगरपालिकां आर्थिक बर्ष २०७५÷०७६ निसें ०७८÷०७९ तकया दुने १० द्वः स्क्वायर फिट स्वयां अप्वः क्षेत्रफल दुगु २७८ गू भवनया नक्सा स्वीकृत याःगु दु । सहरी व्यवस्थापन विभागया प्रमुख सुरज शाक्यया कथं थुगु आर्थिक दँय् कथहं ८६ गू, ७७ गू, ६५ गू व ५० गू छेँया नक्सा स्वीकृत याःगु दु ।
२०८० साल बैशाख १ गतेनिसें ५ द्वः स्क्वायर फिटतकया छेँया नक्सा स्वीकृत यायेगु अधिकार वडातय्त लःल्हाःगु दु ।