येँ महानगरपालिकाया निर्वतमान मेयर विद्यासुन्दर शाक्यं थः मेयर जुयागु इलय् यानागु लँय् आधुनिक मत जडान यायेगु सहमति कार्यान्वयन यायेत्यंगुलि मेयर बालेन्द्र शाहयात सुभाय् ब्यूगु दु।
शाक्यं विहीबाः सञ्चारकःमिपिनिनाप खँल्हाबल्हायासें पुलांगु सहमतिकथं महानगरपालिकां मू मू थासय् च्वंगु लँय् मत तयेगु ज्या यायेत्यंगुलि सुभाय् देछानादीगु खः ।
‘येँ च्वंगु लँ झः झः धायेकेगु निति स्वदँ न्ह्यःया सहमति कार्यान्वयन यायेत्यंगुलि जि लय्तायागु दु । मेयर शाहयात सुभाय् दु।’ शाक्यं धयादीगु दु।
महानगरपालिकां मू मू थासय् च्वंगु लँय् मत तयेगु निंतिं महानगरपालिका, नेपाल विद्युत प्राधिकरण व सडक विभाग दथुइ वंगु २०७७ मंसिर २५ गते विहीबाः सहमति जूगु खः। सहमति कथं ज्या यायेगु निति मंगलबाः स्वगू हे निकाय दथुइ सम्झौता यानागु खँ धका महानगरपालिकां धाःगु खः।
सम्झौताय् लँय् मत तयेगु निति ११ करोड ९९ लाख ७४ हजार ९ सय २५ रुपैयाँ लागत अनुमान याःगु खः। थ्व स्वया न्ह्यः तत्कालीन भौतिक पूर्वाधार नाप यातायातमन्त्री वसन्तकुमार नेम्वाङ्ग व तत्कालीन मेयर शाक्यया उपस्थितिइ तत्कालीन प्रमुख प्रशासकीय अधिकृत राजेश्वर ज्ञवाली, तत्कालीन प्राधिकरणका का.मु कार्यकारी निर्देशक हितेन्द्रदेव शाक्य, तत्कालीन विभागया महानिर्देशक केशवकुमार शर्मा दथुइ उगु सहमति जूगु खः।
महानगरपालिकां ६० प्रतिशत व प्राधिकरणं ४० प्रतिशत लगानीइ लँय् मत तयेगु सहमतिपत्रय् उल्लेख यानातःगु दु। प्राधिकरणं ४० प्रतिशत बिइगु ध्यवा न महानगरपालिकां बिइगु व उगु रकमय प्राधिकरणं याइगु लगानी न समायोजन यायेगु सहमति जूगु खः। सहमतिइ धयातःगु दु,‘उगु ज्याया लागि लागत अनुमान तयार यायेगु, प्रविधिया छनौट यायेगु व निर्माण यायेगु ज्या सुपरीवेक्षण यायेगु लगायतया ज्या प्राधिकरणं यायेगु व आयोजनाया निर्माण ज्या लिपा भिंकेमाःगु लँ व फुटपाथ लगायतया ज्या विभागं याइ।’
लँय् मत तयेगु, सञ्चालन विषय समन्वय, अनुगमन नाप रिपोटिंग यायेत स्वंगू हे कार्यालयया प्रतिनिधि दुथ्याका आःयागु संयन्त्रयात निरन्तरता बिइ, उगु संयन्त्रं लँ सम्भाव्य विस्तार थाय् म्हसिका अध्ययन याना ४५ दिं दुने प्रतिवेदन पेश यायेगु सहमतिपत्र धयातःगु दु।