नेवाःतय्गु राष्ट्रिय संगठन नेवाः देय् दबू स्वनिगः विशेष प्रदेशं शनिवाः छगू ज्याझ्वःया दथुइ स्वनिगःपाखें वाग्मती प्रदेशय् प्रतिनिधित्व यानादीपिं सकल सांसदपिन्त छगू हे दबुलिइ मंकाः कथं हनेज्या याःगु दु ।
स्वनिगलं प्रनिनिधित्व यानादीपिं वाग्मती प्रदेशया प्रत्येक्ष व समानुपातिक याना मुक्कं ५३ म्ह सांसदत दु । वय्कःपिं सकलसित ब्वनाः अथे मंकाः कथं हनेज्या याःगु खः । उगु ज्याझ्वलय् २९ म्ह वाग्मती प्रदेशया सांसदपिं सहभागी जुयादीगु खःसा वय्कःपिन्त हनेज्या याःगु खः ।
मिजंपिं सांसदपिन्त नेवाः परम्परा कथं खेँ सगं बिया, धौ सगं बिया नापं बेतलिं चिना हनेज्या याःगु खःसा मिसापिन्त नेवाः परम्परा कथं खेँ संग बिया धौ सगं बिया दोसल्र्लां न्ययेका हनेज्या याःगु खः ।
नेवाः देय् दबू स्वनिगः विशेष प्रदेशया नायो श्रीकृष्ण महर्जनया नायोसुइ अले नेवाः देय् दबूया केन्द्रीय नायो पवित्र बज्राचार्यया मूपाहांसुइ उगु ज्याझ्वः जूगु खः ।
स्वनिगः विशेष प्रदेशया मुख्य सचिव गणेशमान श्रेष्ठं संचालन यानादीगु उगु ज्याझ्ववलय् नेवाः देय् दबू येँ जिल्लाया नायो धनबहादुर महर्जन तिमिला, ख्वप जिल्लाया नायो नरेश नेवाः व यल जिल्लाया बरिष्ठ न्वकू कृष्णभक्त डंगोलपिन्सं भिंतुना न्वचू बियादीगु खः । स्वनिगः विशेष प्रदेशया मिसा न्वकू प्रा. डा. अमिता प्रत्रानं लसकुस न्वचू बियादीगु खः ।
अथे हे नेवाः देय् दबू स्वनिगः विशेष प्रदेशपाखें सांसदपिन्त भिंतुना नापं ध्यानाकर्षण पौ नं लःल्हाःगु खः ।
विशेष याना भाषा अयाोगं वाग्मती प्रदेशय् नेपालभाषायात नं सरकारी कामकाजया भाषाया रुपय् सिफारिस याःगुलिसें उकिया नितिं स्वनिगः विशेष प्रदेशं याःगु गतिविधि, चुनाव न्ह्यः राजनीतिक दलतय्त बिउगु नेवाः मंकाः मुद्दा लगायतया भ्वंत दुथ्याका सकलसित उगु पौ तकं लःल्हाःगु खः ।
ज्याझ्वलय् न्वंवायेगु झ्वलय् वाग्मती प्रदेशया उपसभामुख अप्सरा चापागाई खत्री, राप्रपाया राजेन्द्र प्रजापति, एमालेया जयराम थापा, माओवादी केन्द्रयिा देवेन्द्र श्रेष्ठ, कांग्रेसया हरिप्रभा खड्गी, हाम्रो नेपाली पार्टीया शैलेन्द्रमान बज्राचार्यपिन्सं नेवाः मंकाः मुद्दायात नितिं माःगु कथं पलाः ल्ह्वनेगु बचं बियादीगु खः ।
थुगु ज्याझ्वः नेवाः देय् दबू स्वनिगः विशेष प्रदेशया ग्वसालय् जूगु खःसा नेवाः देय् दबू येँ जिल्ला समिति, यल जिल्ला समिति, ख्वप जिल्ला समितिया विशेष ग्वहालिइ अले स्वनिगःया फुक्क हे पालिकाया समितिया ग्वहालिइ जूगु खः ।