नेकपा (माओवादी केन्द्र)या अध्यक्ष पुष्पकमल दाहाल नेपाःया न्हूम्ह प्रधानमन्त्रीइ नियुक्त जूगु दु ।
मंसिर ४ गते क्वचाःगु प्रतिनिधिसभाया चुनाव लिपा गुगुं नं दलं स्पष्ट बहुमत हय् मफयेवं सरकार सुनां दयेकेगु धइगु खँय् ताःहाकः बहस न्ह्याःगु खः ।
नेपाःया संविधानया धारा ७६ (१) कथं सरकार दयेके मफइगु जुसेंलि राष्ट्रपति विद्यादेवी भण्डारीं पुस ३ गते संविधानया धारा ७६(२) कथं सरकार दयेकेत आइतवाः सनिलया ५ ता ईतक ई बियादीगु खः ।
व हे समयसीमा दुने सरकार दयेकेगु निंतिं वाम–लोकतान्त्रिक गठबन्धन व मेमेगु पक्षया दथुइ ताःहाकः सहलह जूगु खः । चुनाव न्ह्यः हे वामलोकतान्त्रिक गठबन्धन दुने प्रधानमन्त्रीया रुपय् पुष्पकमल दाहालयात न्ह्यःने हःगु खःसां चुनाव लिपा न्हापांगु दल जूगु नेपाली काँग्रेसं सरकारया नेतृत्व थःपिसं हे यायेगु अडान कायेवं नेकपा (माओवादी केन्द्र) वाम–लोकतान्त्रिक गठबन्धनं पिने वःगु खः ।
नेकपा (एमालें) राष्ट्रपति थःपिसं कायेगु यानाः प्रचण्डयात हे प्रधानमन्त्री दयेकेगु प्रस्ताव तसेंलि उकिया समर्थनय् राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी र नागरिक उन्मुक्ति पार्टीं ल्हाःचिं तःगु खः । वय्कःयात स्वतन्त्र सांसदपिं प्रभु साह, किरणकुमार साह व अमरेशकुमार सिंहं समर्थन यायेवं २७५ दुजः दुगु प्रतिनिधिसभाय् प्रचण्डं १६९ सांसदया समर्थन काःगु दु । गुगु निगू तिहाइया बराबर खः ।
प्रचण्डया नेतृत्वय् न्हूगु गठबन्धनं सरकार दयेकीगु जुइ धुंकाः नेपाली काँग्रेस प्रतिपक्षय् सीमित जूवंगु दु ।
