वापौ लहना प्यसःल्याः पुवंगु लसताय् शुक्रवाः पत्रकारिताख्यः, संचारख्यः लिसें भाषा ख्यया थीथी व्यक्तित्वपिन्त सिरपा लःल्हागु दु । थ्व हे झ्वलय् लहना धर्म मोति सिरपा ११४२ मेरो साप्ताहिकया सम्पादक रत्नकाजी मनयात लःल्हाःगु दु । थुगु सिरपाः ने.सं. ११४० या निंतिं प्रजित शाक्य व ने.सं. ११४१ या निंतिं विराजकाजी राजोपाध्याययात लःल्हागु दु ।
अथेहे लहना शर्मिष्ठा सुर सम्मान ११४० रामकृष्ण खडगी, ११४१ स्वतन्त्र संसारं महर्जन व ११४२ यलु जोशी यात लःल्हागु दु । अथेहे लहना न्यु जेनिथ फोटो पत्रकारिता सिरपा ११४० अनुप प्रधान, ११४१ गुणराज शाक्य व ११४२ श्याम कुमार यात लहना केशव कृष्णवदन मातृभाषा सिरपा ११४० नविन जोशी, ११४१ नजरराम महर्जन व ११४२ पुर्णिमा शाक्ययात लः ल्हागु खः ।
अथेहे दकलय् तःधंगु सिरपा कथं पंञ्चवीर सिंह सिरपा ११४० नेवाः न्ह्यलुवा मल्ल के सुन्दर , ११४१ संघिय मामिला मन्त्री राजेन्द्र प्रसाद श्रेष्ठ व ११४२ निवर्तमान मेयर विद्या सुन्दर शाक्ययात देछागु दु । नेपालभाषा एकेडेमीया चान्सलर यज्ञरत्न धाख्वाः मूपाहाँ कथं झायादीगु ज्याझ्वलय् लहनाया व्यवस्थापक सुरेन्द्र भक्त श्रेष्ठं लसकुस न्वचु तयादीगु खः । अथेहे थी थी व्यक्तित्व पिन्सं थगु नुगः खँ तयादिगु खः ।
ज्याझ्वलय् लोककवि राजभाइ जकःमिं चिनाखं ब्वनादिगु खःसा सुरजबीर बज्राचार्यं, रोजी डंगोल श्रेष्ठ , एन्जेला श्रेष्ठ , सबिना मानन्धर, प्रणित शाक्य, सनया महर्जन, सायना महर्जन लिसेंया कलाकारपिन्सं म्येलिसें हुलाप्याखं न्ह्यब्वयादीगु खः ।
अनुप शाक्यं न्ह्याकादीगु ज्याझ्वः लहना मिडियाया नायः नृपेन्द्रलाल श्रेष्ठया नायःसुइ जूगु खःसा प्रदेश सांसद राजेश शाक्य विशेष पाहाँकथं ब्वति कयादीगु खः ।