श्रीशान्तिघट बज्रधातु चैत्य महाविहार श्रीघलय् विराजमान जुया च्वना बिज्याम्ह आराध्य देवी हारति अजिमाया देगःया पुनः निर्माण ज्या क्वचाःगु दु । दच्छि न्ह्यः २०७८ माघ ३ गते पिइगु शुरु याना निर्माण ज्या न्ह्याकुगु थ्व देगः दच्छि दु खुन्हु वि सं २०७९ माघ ३ गते हे निर्माण क्वचायेका पलिस्था पुजा यायेखंगु धइगु लसताया खँ खः धका श्रीशान्तिघट बज्रधातु चैत्य महाविहार संरक्षण समितिया नायः व हारति अजिमा देगः पुनःनिर्माण उपभोक्ता समितिया छम्ह संयाेजक शुभकाजी शाक्यं धयादिल ।
अथेहेतुं अजिमा देगः पुनःनिर्माण उपभोक्ता समितिया मेम्ह संयाेजक पुरन शाक्यं येँ महानगरपालिकाया तत्कालिन मेयर विद्या सुन्दर शाक्यं देगः पुनःनिर्माणया निंतिं आर्थिक ग्वाहालि यानादीगु खँ कनादिल ।
हारति अजिमा देगः पुनःनिर्माणया ज्या क्वचाःगु लसताय् मङ्गलबार श्रीघलय् जुउगु ज्याझ्वलय् वयकपिन्सं थःगु नुगःखँ थथे तयादीगु खः ।
महानगरपालिकाया उप मेयर सुनिता डंगोल मूपाहाँ कथं येँ झायादीगु उगु ज्याझ्वः श्रीशान्तिघट बज्रधातु चैत्य महाविहार श्रीघःया थकालि आजु कर्ण शाक्यया सभानायसुइ जुउगु खः । थकालि शाक्य छम्ह नांजाम्ह पर्यटन व्यवसायी खःसा वयक सकारात्मक सोच अभियानया न्ह्यलुवा नं खः। मूपाहाँ उप मेयर डंगोलं बोधिमतय् मत च्याका उलेज्या यानादीगु उगु ज्याझ्वलय् देगः पुनःनिर्माण क्वचाःगु लसताय् पिहावःगु लुमन्ति पौ या नं पितब्वज्या जुउगु खःसा ज्याझ्वलय् देगःया पुनःनिर्माण ज्या तालाकेत ग्वाहालि याःपिन्त सम्मान नं याःगु खः । ज्याझ्वलय् ये वडा नं २५ या पुलांम्ह वडा अध्यक्ष नीलकाजी शाक्यया नं विशेष उपस्थिति दुउगु खः ।
ज्याझ्वलय् थःगु नुगःखँ तयेगु झ्वलय् मूपाहाँ डंगोलं श्रीघलय् थुकथं शाक्य सर्वसंघ मिले जुया हारति अजिमाया देगःया पुनःनिर्माण ज्या तालाकुगु खँ यात च्वछासे थज्यागु धार्मिक एेतिहासिक व सांस्कृतिक महत्वया सम्पदा संरक्षणया ज्याय् येँ महानगरपालिका सदां न्ह्यचिला च्वनि धका धयादिल । ज्याझ्वलय् संरक्षण समितिया लिउ दाँभरीं व देगः दयेकेज्या या आर्थिक संयोजक रविन्द्र शाक्यं देगः पुनःनिर्माणया ल्याः चा न्ह्यब्वया दीगु खः।