न्हाय्कं डटकमया सम्पादकलिसें नेपालभाषा स्यनामि सृजना महर्जनजुयात ने.सं. ११३८ या निंतिं चैन लाकाैल सिरपाः लःल्हाःगु दु ।
थाैं नेपालभाषा केन्द्रीय विभागया इरा-गाैरी कक्षय् जूगु छगू विशेष ज्याझ्वलय् वय्कःयात थुगु सिरपाः लःल्हाःगु खः ।
संस्कृति पर्यटन तथा नागरिक उड्डयन मन्त्री जीवनराम श्रेष्ठया मूपाहाँसुइ जूगु ज्याझ्वलय् काेभिड-१९ या हुनिं दिनाच्वंगु सिरपाः इनेज्या जूगु खः । ज्याझ्वलय् नुगःखँ तयादिसें मन्त्री श्रेष्ठं नेपालभाषा केन्द्रीय विभागपाखें संस्कृतियात कयाः याइगु अध्ययनया निंतिं ग्वाहालि यायेगु बचं बियादिल सा पर्यटकपिन्त ताहाकः ई तयेगु निंतिं सम्पदा मार्ग स्वायेगु व अन पर्यटकीय गतिविधि अप्वयेकेगु पाखे याेजना दयेकागु खँ कनादिल । (स्वयादिसँ मा. जीवनराम श्रेष्ठया न्वचु)
ने.सं. ११३७, ११३८ व ११३९ या निंतिं चैन लाकाैल सिरपा, तारा लाकाैल सिरपा व रजनी लाकाैल सिरपा लःल्हाःगु खः । चैन लाकाैल सिरपाः नेपालभाषाय् स्नातकाेत्तर तगिमय् मिसात मध्ये दकले अप्वः ल्याः हःम्ह, तारा लाकाैल सिरपा मिसा मध्ये लिउ लाःम्ह व रजनी लाकाैल सिरपाः लियांल्यू लाःम्हेसित लःल्हाइगु सिरपाः खः ।
ने.सं. ११३७ या निंतिं चैन लाकाैल सिरपा तेजमाया महर्जन, तारा लाकाैल सिरपा रेणु श्रेष्ठ व रजनी लाकाैल सिरपा मेरिना सिख्राकारं त्याकेत ताःलाःगु खः ।
ने.सं. ११३८ या निंतिं सम्पादक सृजनालिसें जसना राजभण्डारी व आरिकमाला प्रधान अथेहे ने.सं. ११३९ या निंतिं कबिना नेपाली, सिल्भा प्रधान व करूणा प्रधानपिसं कथहं चैन, तारा व रजनी लाकाैल सिरपा त्याकादीगु खः ।
बैकुण्ठ लाकाैल पुरस्कार समितिया दुजः प्रा. सुन्दरकृष्ण जाेशीं लसकुस यानादीगु ज्याझ्वलय् सहप्रा. काशीनाथ तमाेट व प्रा.डा. त्रिरत्न मानन्धरपिन्त बैकुण्ठ लाकाैल सिरपा लःल्हाःगु खः ।
नेपालभाषा केन्द्रीय विभागया नायःलिसें बैकुण्ठ लाकाैल पुरस्कार समितिया नायः सहप्रा. राजनलाल जाेशीया नायःसुइ जूगु ज्याझ्वलय् सिरपाया दाता इ. श्रीकण्ठ लाकाैलं सुभाय् देछानादीगु खः ।