नेवाः हक अधिकार व नेवाःतय्गु राजनीतिक चेतना अभिवृद्धिया तातुनां स्वनातःगु नेवाः राष्ट्रिय आन्दोलनपाखें नेपाः पासा पुचः अमेरिकाय्या नायः मनोहर श्रेष्ठयात वंगु बिहीवाः छगू ज्याझ्वः यासें हंगु दु ।
नेपाली समाज अमेरिकाया नायःलिसें समाजसेवी समीर महर्जनया मूपाहाँसुइ जूगु ज्याझ्वलय् भिंतुना देछासें वय्कलं अमेरिकाय् नेवाःतय्गु न्हापांगु संस्थाकथं नेपाः पासा पुचः अमेरिकाय् दुगु सकसिनं स्यूगु व उगु संस्थापाखें नेवाः संस्कार व संस्कृतियात अमेरिकाय् जीवन्त यानातय्गु निंतिं ज्वःमदुगु भूमिका म्हितावयाच्वंगु खँ कुलादिल । वय्कलं थःपिं अमेरिकाय् च्वनाच्वनागु जूसां नेपालय् छु जुयाच्वन धइगु च्यूताः न्ह्याबलें दयाच्वनीगु अले थनया उत्थानया निंतिं थःपिसं छु याय् फइ धइगु चिन्तन न्ह्याबलें जुइगु नं ज्याझ्वलय् कनादिल ।
आन्दोलनया जःपिनिलिसें पूर्वमन्त्री डा. केशवमान शाक्य, पूर्वमन्त्री तीर्थराम डंगोल, डा. महेशमान श्रेष्ठ, प्रा. मदनसेन बज्राचार्यलिसेंया विशिष्ट व्यक्तित्वपिनि ब्वति दुगु सभाय् हना ग्रहण लिपा न्ववानादिसें पासा पुचःया नायः मनोहर श्रेष्ठं थःम्हेसिनं फयाच्वनागु हना अमेरिकाय् नेवाः अस्तित्व म्वाकेत थः स्वयां न्ह्यःया अग्रजपिनि योगदानया हुनिं खः थें ताःगु धयादिल । वय्कलं थःत हंगु जक मखुसे मुक्कं पासा पुचःयात हे हंगु ताय्कागु कनादिल ।
आन्दोलनया नायः लोककवि राजभाइ जकःमिया नायःसुइ वय्कःया हे छेँय् न्ह्याःगु सभायात सम्बोधन यानादिसें वय्कलं नेवाःतय्गु अधिकार प्राप्ति व राजनीतिक चेतना अभिवृद्धिया तातुनां स्वनातःगु खँ कनादिल । वय्कलं नेपालं पिने अमेरिका थें च्वंगु व्यस्त थासय् च्वनाः नेवाः भाषा, जाति, संस्कृति उत्थानया निंतिं जीवन पानाच्वनादीपिन्त हनाबना तयेगु तातुनां नेपाः पासा पुचःया नायः मनोहर श्रेष्ठ व नेपाली समाज अमेरिकाया नायः जुयाः नेवाः जक मखु नेपाःमिपिनि हे नेतृत्व यानाच्वनादीम्ह नेवाः न्ह्यलुवा मूपाहाँ समीर महर्जनयात नं हनेज्या हे यानागु धयादिल ।
आन्दोलनया न्वकु गोर्की श्रेष्ठं लसकुस यानादीगु ज्याझ्वः दुजः रत्न काजी महर्जनं न्ह्याकादीगु खः ।
