स्वनिगःया बौद्ध विहार (बहाःबही) या इतिहास व संस्कृति सम्बन्धी सफू तयार यायेगु आज्जुं थ्व हे फागुण २१ गते शनिवाः यलय् तःजिगु अन्तर क्रियात्मक गोष्ठी जुइगु जूगु दु । बौद्ध विहार संघ यलं पुल्चोकय् च्वंगु अक्षयेश्वर महाविहारय् निन्हुयंकं गोष्ठी न्ह्याके त्यनागु थौं ग्वसाःग्वःगु पत्रकार मुनाज्याय् कंगु दु ।
गोष्ठीया खँचु नेपाल मण्डलया बहाःबहीया इतिहास, संस्कृति व अभ्यास बौद्ध संगोष्ठी तयातःगु दु ।
‘ लिच्छिविकालीन व मल्लकालीन बौद्ध विहारया इतिहास सम्बन्धी नेपाःमिपिसं च्वःगु सफू म्हे जक दु । थीथी इलय् प्रकाशित सफूत नं आः बजारय् न्यायेगु मदु । उकिं बहाःबहीया इतिहास, संस्कृति व अभ्यास सम्बन्धी प्रमाणिक, विवरणात्मक व व्याख्यात्मक पुस्तक तयार यायेगु तातुनां उगु ज्याझ्वः ग्वसाःग्वयेत्यंगु खः ।’ वरिष्ठ उपाध्यक्ष करणा बज्राचार्यं कनादिल ।
गोष्ठीइ न्ह्यब्वइगु ज्यापौ व उकिया बारे जुइगु सहलहयात कःघानाः सफूया स्वरुप बीगु संघया तातुना दु । गोष्ठीइ लिच्छिविकालीन नेपाल मण्डलय् बहाःबहीया इतिहास, मध्यकालीन नेपालमण्डलय् बहाःबहीया इतिहास, बहाःबही प्रचलनय् दुगु त्रियान परम्पराया दार्शनिक पक्ष, बहाःबहीया कला, बहाःबहीया दीगो संरक्षण लिसेंया यानाः १० गू ज्यापै न्ह्यब्वइगु ज्यासना पुचः दुजः ज्ञानेन्द्र शाक्यं कनादिल ।
‘ इतिहास, संस्कृति व दर्शनया केन्द्रय् च्वंगु बौद्ध विहारया संरक्षण यायेत आधुनिक पुस्तां थुकिया बारे सीके माः । थुकिया संरक्षण यायेगु धइगु मानव सभ्यता, संस्कृति संरक्षण यायेगु खः । थ्व सम्बन्धी पठन संस्कृति विकास यायेगु आज्जुं नं गोष्ठीपाखें कयागु खः । ’ गोष्ठीया कजि गौतममुनि बज्राचार्यं धयादिल ।
उगु लसताय् संघया न्वकु सुरेन्द्र बज्राचार्यं इतिहास, दर्शन, संस्कृति सम्बन्धी रुचि दुपिं न्ह्याम्हसिनं नं गोष्ठीइ ब्वति काये फइ धासें थ्व सम्बन्धी रुचि दुपिं सर्वसाधारणपिन्त ब्वति कायेत इनाप यानादिल ।
