नेवाः संचार ख्यलय् मिसा हस्ताक्षरकथं न्हूगु अनलाइन न्यूज पाेर्टल न्हाय्कं डट कमया थाैं छगू ज्याझ्वःया दथुइ येँ मनपाया मेयर विद्या सुन्दर शाक्यं पितब्वज्या यानादीगु दु ।
सुर संसार मिडियाया न्ह्यब्वया कथं पिलू वःगु थुगु अनलाइनया अध्यक्ष लिसें प्रबन्ध सम्पादक सुनिता महर्जनया सभानायःसुइ जूगु ज्याझ्वलय् शरद कुमार डंगाेल विष्णुवीरं च्वयादीगु सफू संगालाे सुत्र नं विमाेचन जूगु खः ।
येँ मनपाया मेयर शाक्यया मूपाहाँसुइ जूगु ज्याझ्वलय् नुगःखँ तयादिसें शरद कुमार डंगाेलयात छम्ह समाजसेवी व संस्कृतिकःमिया रूपय् म्हसीका वयाच्वनागुली वय्कलं थीथी इलय् च्वयादीगु च्वसु मुना संगालाे सुत्र सफू पिहाँ वःगु स्वये खनाः थः लय्तायागु धयादिसें इया व्यवस्थापनया समस्यां थम्हं अध्ययनय् यक्व इ बी मफयाच्वंगु खँ न्ह्यथनादिल ।
सफुतिइ दुथ्यानाच्वंपिं थीथी व्यक्तित्व मध्ये चक्रमान डंगाेललिसेया थःगु लुमन्ति न्ह्यथनादिसें पूर्व राज्यमन्त्री तीर्थराम डंगाेलया पहलय् गिरिजा प्रसाद काेइरालाया प्रधानमन्त्रित्व कालय् येँ मनपाया परम्परागत ६३ त्वाःयात २० द्वः या ल्याखं वःगु १२ लख ६० द्वः तका चक्रमान डंगाेलया पहलय् निकासा कया हये धुंकाः व ध्यबा त्वाःयात इना बीगुु सन्दर्भय् छगू त्वाःयात २० द्वः दां बीबलय् भ्वय् नयाः हे फुकीगु जूगुलिं थ्व ध्यबा संस्कृति संरक्षणया निंतिं अक्षयकाेषकथं स्वनेगु खँ कंगु लुमंकादिल ।
वय्कलं स्व. डंगाेलं व हे कथं ध्यबा छ्यलाः ज्यापु संस्कृति विकास काेष दयेकूगु व काेषया पासापिनि इनापकथं काेषयात १ कराेड तका थ्यंकेगु तातुनायात पूवंकेत इश्वर पाेखरेल उपप्रधानमन्त्री जुयाः झाःगु इलय् मगाःनिगु ४० लख मध्ये २० लख नेपाल सरकार व २० लख येँ मनपां तयेगु सल्लाहकथं थःपिसं बजेट विनियाेजन याये धुनागु व व ध्यबा याकनं हे प्रक्रिया पूवंकाः कायेत विकास काेषया पदाधिकारीपिन्त मेयर शाक्यं इनाप यानादिल ।
थुकथं हे ज्याझ्वलय् विशेष पाहाँकथं झायादीम्ह येँ मनपाया उपमेयर हरिप्रभा खड्गी श्रेष्ठं नेवाः मिसात न्ह्यज्यानाः न्ह्याकूगु न्हाय्कंया सफलताया कामना यासें सफूया च्वमि डंगाेलयात नं सफू पिथनेत ताःलाःगुलिं भिंतुना देछानादिल ।
ज्याझ्वलय् येँ मनपाया प्रवक्तालिसें येँ मनपा १५ वडाया नायः इश्वरमान डंगाेल, ११ वडाया नायः हेरालाल तण्डुकार, स्वयम्भु ब्याङ्क्वेटया त्रिरत्न मानन्धर पाहाँकथं झायादीगु खः ।
मेराे साप्ताहिकया सच्छि ल्याः पूवंगु लसताय् थुगु वाःपाै न्ह्याकेत तिबः बियावयाच्वनादीपिं च्वमि, विज्ञापनदाता, भिंचितामिपिन्त साप्ताहिकया सम्पादक रत्न काजी मनं सुभाय् देछासें ज्याझ्वलय् लसकुस याःगु खः ।
सफूया च्वमि डंगाेलं सफूयात कयाः नुगःखँ तयादिसें थम्हं थीथी इलय् च्वयातयागु थीथी पत्रपत्रिकाय् पिदंगु च्वसु मुनाः सफूया रूपय् पिथनागु खँ कनादिसें छथाय् हे मुनाबलय् यक्व खँ दाेहाेरय् जुयाच्वंगु खँ नं न्ह्यथनादिल । वय्कलं थुगु सफू थगुने हे पिथनेगु तातुनागु खःसां लकडाउनका कारणं स्थगित जूगु व थाैं विमाेचनया इलय् नं हाकनं काेभिडया त्रास अप्वयाच्वंगुलिं म्हाे जक मनूतय् दथुइ सार्वजनिक यायेगु ज्या जूगु खँ कुलादिल ।
न्हाय्कं डट कमया सम्पादक सृजना महर्जनं न्ह्याकूगु ज्याझ्वः सुर संसार मिडियाया नायः सुनिता महर्जनया सभापतित्वय् जूगु खः ।
