अमेरिकी उपविदेशमन्त्री वेन्डी शरमनं रुसं पश्चिमलिसे कूटनीति सम्बन्ध वा मुठभेड दथुइ छगू ल्यये हे माःगु धाःगु दु ।
उत्तर एट्लान्टिक सन्धी संगठन नेटो व रुसया दथुइ जूगु वार्तालिपा न्ववायेगु झ्वलय् वय्कलं थथे ख्याच्वः ब्यूगु खः ।
युक्रेनया विषययात कयाः खनेदुगु तनाव म्हो यायेगु आज्जुं ब्रसल्सय् नेटो–रुस काउन्सिलया वार्ता जूगु खः । सन् २०१९ थुखे उगु काउन्सिलया थ्व न्हापांगु मुँज्या खः ।
रुसी उपविदेशमन्त्री अलेक्सान्डर ग्रुस्कों नेटों मस्कोया मागतय्त कयाः थःपिन्त ज्याछिनिगू माग जक सम्बोधन याये मफइगु धाःगु दु ।
रुसया मागया सूचीइ युक्रेन गुबलें नेटोय् दुथ्याये मज्यू धइगु नं दु ।
युक्रेनलिसे सीमा सतिक झिद्वलं मल्याक रुसी फौज मुनाच्वंगु दु व उकिं आक्रमणया आशङ्का ब्वलंकूगु दु ।
नेटोय् आवद्ध जुइगु धइगु तातुना युक्रेनया संविधानया छगू ब्व खः । तर उपविदेशमन्त्री शरमनं प्रगति याये फइगु लागा दुगु धाःगु दु अले रुसं आः छु स्वयाच्वंगु दु धइगु निर्णय यायेमाः धयादिल ।
वय्कलं अमेरिका व नेटो फुक्क कथंया सम्भावनाया निंतिं तयारी यानाच्वनागु धाःगु दु ।
