येँ महानगरपालिकाया कार्यबाहक प्रमुख सुनिता डंगाेल व उपत्यका ट्राफिक प्रहरी ज्याकूया प्रमुख प्रहरी वरिष्ठ उपरीक्षक सुरेश प्रसाद काफ्लेया दथुइ येँया सडक सुरक्षा व ट्राफिक व्यवस्थापनयात कयाः थाैं सहलह जूगु दु ।
सहलहया झ्वलय् कार्यवाहक प्रमुख डंगाेलं धयादिल, ‘ट्राफिक व्यवस्थापनय् सहरया ख्वाःपाः जक स्वयाः मखु, झट्ट स्वयेबलय् खने मदुगु थासय् गुकथं व्यवस्थापन जुयाच्वंगु दु । व नं स्वयाः ज्या याये । हाकुका तःगु लँय् पार्किङ याःगु मदु । थुकिं सहरया ख्वाः बांलाका ब्यूगु दु । थ्व बांलाःगु ख्वाःपाः उबले थी, गुबले दुने गल्ली व चुकय् सवारी साधनया चाप व्यवस्थापन जुइ। सवारी चालकं ढुक्क जुयाः पार्किङ स्थल गुगु खः धकाः म्हसीके फइ । अले छ्यले फइ । छखेया चाप मेखे न्ह्याइमखु ।’
वय्कलं धयादिल, ‘पार्किङया सुविधा व विकल्प बियाः व्यवस्थापन यायेनु । ट्राफिक प्रहरी व महानगर प्रहरीदथुइ क्वातुगु स्वापू तयाः दीर्घकालीन ज्या यायेनु । थुकिया निंतिं महानगरपालिकां ट्राफिक प्रहरीयात माःगु ग्वाहालि बीगु जुइ ।’
सहलहया झ्वलय् ट्राफिक प्रहरी कार्यालयया प्रमुख काफ्लें धयादिल, ‘येँया पूर्वाधारलिसे सवारी चालकतय्गु मनोविज्ञान स्वानाच्वंगु दु । लँय् खिपः प्यनातःगु दुसा, काेन तयातःगु दुसा जक ट्राफिक नियमया पालना याइगु, थुज्वःगु पूर्वाधार तया मतःगु थासय् न्ह्यःने लाःथे यायेगु परिपाटी दु । पूर्वाधारलिसे सम्बन्धित थ्व मनोविज्ञान सुधारय् ज्या यायेमाः ।’
चालकतय् अनुशासनया खँ ल्हासें वय्कलं धयादिल, ‘वंगु प्यन्हु दुने ब्वनेकुथिया गाडी चले याइपिं १६ म्ह चालकं सुथय् हे मादक पदार्थ सेवन याःगु लूगु दु । थ्व छगू बिम्ब खः । झीसं सुधार यायेमाःगु यक्व थाय् दु । थुकी महानगरपालिकाया ग्वाहालिइ ज्या याये ।’
वय्कलं असार जःछि सचेतनामूलक ज्याझ्वः न्ह्याकाः सडक सुरक्षा व नियम पालनाय् जिम्मेवार जुइत इनाप यायेगु व साउन महिनानिसें कडा कानुनी कारवाही यायेगु योजना दुगु कनादिल ।
सहलहया झ्वलय् लँय् प्रविधियुक्त सीसीटिभी क्यामरा जडान यायेगु, जडान जूगु क्यामरायात निगरानी कक्षय् स्वायेगु, सडक संरचना व मेमेगु भौतिक संरचना निर्माण याइबलय् तइगु निर्माण सामग्रीया नियमन यायेगु, फोहर संकलन यायेबलय् आवागमनय् लाइगु समस्या म्हाे याकेगु, बर्खां सडकय् जुइ फुगु डुवान न्यूनीकरण यायेगु, पार्किङया वैज्ञानिक व्यवस्थापन यायेगु लिसेंया ख्यः सुधारया निंतिं महानगरपालिका, महानगर प्रहरी बल व ट्राफिक प्रहरी कार्यालय दथुइ सहकार्यया विषय सहलहया मू खँत खः ।
येँया सहरी व्यवस्थापनया विषयमध्ये ट्राफिक व्यवस्थापन प्रमुखमध्येया छगू खः । थ्व बहुुपक्षीय ज्या नं खः । थुकिया सुधारं नागरिकं सरकारया ज्या न्यने फइ । महसूस याये फइ । नाप लाके फइ । थ्व आज्जु नाप लाइकथं ज्या याये । सहलहया निष्कर्ष खः ।
सहलहय् महानगरपालिकाया प्रमुख प्रशासकीय अधिकृत सरोज गुरागाईँ, महानगर प्रहरी बलया प्रमुख विष्णुप्रसाद जोशी, प्रहरी उपरीक्षक नरेशराज सुवेदीलिसेंया अधिकारीतय् ब्वति दुगु खः ।