येँदेयया शाक्य समुदाययात संगठित याना न्ह्याका च्वंगु शाक्य महाविहार संघया झिदँ बुदिं छगू ज्याझ्वः याना हंगु दु । बागमति प्रदेशया सांसद माननीय नुरज बज्राचार्य मूपाहाँ कथं झायादीगु उगु ज्याझ्वः संघया अध्यक्ष शुभकाजी शाक्यया सभानायसुइ जूगु खः ।
ज्याझ्वलय् मूपाहाँ बज्राचार्यं झीगु बहाबही धइगु बौद्ध धर्मया म्हसिकाजक मखसे येँदेयया हे ज्वमदुगु म्हसिका खः धका धयादिसे बहाबहीया नापनापं बौद्ध धर्मया संरक्षण व प्रवर्द्दन यायेगु ज्याय् शाक्य महाविहार संघपाखें छिनाच्वंगु पलाःया तारीफ याना दिल । वयकलं शाक्य महाविहार संघ लगायतया बुद्ध धर्मलिसे स्वापु दुगु संघ संस्थायात माःकथं ग्वाहालि यायेत थः गबलें लिचिले मखु धका धयादिल ।
संघया महासचिव संघरत्न शाक्यं लसकुस नुगःखँ तया न्ह्याकदीगु उगु ज्याझ्वलय् संघया सल्लाहकार तेजरत्न शाक्य व कानून सल्लाहकार ज्ञानकुमार शाक्य पिन्सं नं नुगःखँ तयादीगु खः ।