नेपालभाषाया सांगीतिक ख्यलय् ताःई न्ह्यः निसें थःगु नुगः क्वसायेका वया च्वनादीम्ह येँ महानगरपालिका १८ वडाया अध्यक्ष न्हुच्छेकाजी महर्जनया न्हूगु निपू म्ये क्लाय्सिक ब्यांक्वेटय् पितब्वज्या जूगु दु । यंलाथ्व पारु खुन्हु लाःगु थःगु बुदिंया लसताय् लसंहना ज्याझ्वःयाना निपू म्येया पितब्वज्या यानादीगु खः । छम्ह म्ये च्वमि कथं व संगीतकार कथं न्हूच्छे काजी महर्जनयात नेपालभाषाया सांगीतिक ख्यलय् यक्वस्यां म्हस्यु सां अभिनय् ख्यलय् नं न्हूच्छे काजी महर्जनया आपालं हे भिडियो पिथना दीधुंकुगु दु । अाइतबार पिदंगु म्ये मध्ये छपू म्येय् वय्कलं हे निर्देशन यानादीगु दु । तिम्रो दिलमा चोट लाग्दा बोलया नेपाली खस म्येया निर्देशन न्हूच्छे काजी महर्जन थःम्हं हे याना दीगु दु । थुगु म्ये वय्कलं हे च्वयादीगु खःसा अनिल शाहीं म्ये हालाः संगीत नं तयादीगु खः । म्येया छायाँकन व सम्पादन सुरेन्द्र महर्जनं याःनादीगु दु । म्येय् न्हूच्छे काजी महर्जन व रविना महर्जनं अभिनय यानातःगु दु । अथे हे मेगु म्ये जि यःम्ह सिरिमतिचा बोलया म्ये नं पिदंगु खः । थुगु म्ये राजमतिया लोक लसय् अनिल शाहीं न्हूगु एरेन्ज यानातःगु खःसा म्येय् राजेन्द्र शाक्य व सविना मानन्धरं हालातःगु खः। थुगु म्येय् नेपालभाषाया लोकंह्वाःम्ह कलाकार रवि डंगोल लिसें रविना तुलाधरं अभिनय यानातःगु दु । म्येया निर्देशन बाल मुकुण्द प्रजापतिं यानादीगु खः । अथेहेतुं छायाँकन व सम्पादन सैलेश श्रेष्ठ लुभुं यानादीगु थ्व भिडियोया परिकल्पनाकार के बि एस लुभु खः । ज्याझ्वलय् पूर्व मेयर विद्या सुन्दर शाक्य मू पाहां कथं झायादीगु खःसा नेपालभाषाया न्हापांम्ह सिने पत्रकार बिजयरत्न असंबरें नितां हे भिडियोया समिक्षा यानादीगु खः । न्हूच्छे काजी महर्जनया बुदिंया लसताय् ज्याझ्वलय् म्ये हालामि रीता महर्जन, सरस्वती मानन्धर, राजेन्द्र शाक्य, सविना मानन्धर व रोजी श्रेष्ठ डंगोल पिन्सं सांगीतिक प्रस्तुति नं न्ह्यब्वयादीगु खः ।