वसन्तपुर लिक्क लाःगु मरुया श्रीखण्ड तरुमुल महाविहारया प्रांगनय् पलिस्था याःगु लोकंव्हाम्ह बौद्ध आचार्य लिलाबज्र बज्राचार्यया पूर्णकदया झ्वाता उलेज्या नेसं ११४५ यँलाथ्व पारु २०८२ साल भाद्र ८ गते आइतवाःया दिनय् थुगु हे महाविहारया स्वम्ह थायपाजुपिन्सं याना बिज्यागु दु । थुगु ज्याझ्वलय् पाहां उपमेयर सुनिता डंगोल व शैलेन्द्र मान बज्राचार्यजुपिंन्सं उगु झ्वाताय् खादागा नयका हना वना तयादीगु खः ।
लच्छि यंका ह्याःगु गुंला पर्वया अवसरय् थुगु विहारय् स्तोत्र ब्वने क्वचागु लसताय् न्याकूगु पारु भ्वय्या अवसरय् थुगु ज्याझ्वः जूगु खः । लिलाबज्र बज्राचार्यया वासस्थानया रुपय् कया वयाच्वंगु थुगु श्रीखण्ड तरुमुल महाविहारया संरक्षण तथा सञ्चालन समितिया नायो ई. दिल्लीरत्न शाक्यं थुगु प्रतिमा मूर्तिकार महेश तुलाधरं दयकादीगु खँ कनादीगु दु । वय्कलं थुकथया स्यल्लागु मूर्ति दय्कादीगुया कदर स्वरुप वयकयात नं हनेज्या याःगु खः ।
उगु झ्वाता उलेज्या ज्याझ्वलय् वागमति प्रदेशया पूर्वमन्त्री एवं सांसद शैलेन्द्रमान बज्राचार्यं बौद्ध आचार्य लिलाबज्र बज्राचार्यया योगदानयात कयाः थःगु धारणा तयादीगु खःसा वयकः आचार्ययात विश्वय् हे चर्चा खँय् बः बियादीगु खः । थुकथं हे ज्याझ्वलय् येँ हानगर पालिकाया उपमेयर सुनिता डंगोलं नं थःगु नुगः खँ तयादीगु खःसा वयकलं थःगु नुगः खँया झ्वलय् थःगु संस्कृति व मौलिकतालाई ल्यंका तयाः न्हू पुस्तापिन्त पुस्तान्तरण याना वनेमाmगु थौंया ईया आवश्यकता जुयाच्वंगु धारणा पित बियादीगु खः ।
उगु ज्याझ्वलय् थुगु दँय् एसईई परीक्षाय् ताः लाकेत ताःतापिं महाविहारया कूलपुत्र व कूलपुत्रीपिन्त येँया उपमेयर मयजु सुनिता डंगोलं हनापौ देछाया हनेज्या नं याःगु खः । समाजया छ्याञ्जे संघरत्न शाक्यजुं न्ह्याकादीगु थुगु ज्याझ्वलय् ज्याझ्वःया अन्तय् दिल्ली रत्न शाक्यजुं थःगु मन्तव्य तयाः सकसितं सुभाय् देछानादीगु खः । उगु ज्याझ्वलय् येँ मनपा २३ वडाया वडानायो मचाराजा महर्जनया नं उपस्थित दुगु खः ।