पालय् प्राणघाटक ल्वय् रुबेला न्हंनावन : विश्व स्वास्थ्य सङ्गठन

 विश्व स्वास्थ्य सङ्गठनं नेपालय् रुबेला न्हंनावनेधुंकूगु घोषणा याःगु दु । थ्व नापं मस्तय्गु निंतिं प्राण घाटक जुयाच्वंगु ल्वय् रुबेला न्हंकाछ्वयेत नेपाः ताःलाःगु खः । थुगु ल्वय् न्हंकेत ताःलागुलिइ विश्व स्वास्थ्य सङ्गठनया दक्षिण–पूर्वी एसिया क्षेत्रीय प्रमाणीकरण आयोगं नेपाः सरकार, स्वास्थ्य लिसें जनसङ्ख्या मन्त्रालययात बढाई ब्यूगु दु । सङ्गठनया दक्षिण पूर्वी एसिया ज्याकुथि प्रमुख डा क्याथरिना बोएम्हं स्वास्थ्य लिसें जनसङ्ख्या मन्त्रालययात सोमबाः पौ छ्वयाः उगु बढाई ब्यूगु खः । ताः ई न्ह्यवंनिसें कुतः जुया च्वंसां नं मस्तय्गु प्राण कयाच्वंगु थुगु ल्वय् न्हंके मफयाच्वंगु खः । छुं ई थुखे नेपालं याःगु कुतःया मापदण्डयात लिधंसा कयाः विश्व स्वास्थ्य सङ्गठनं नेपालय् रुबेला न्हंनावनेधुंकूगु घोषणा याःगु खः । स्वास्थ्य लिसें जनसङ्ख्यामन्त्री प्रदीप पौडेलं सामाजिक सञ्जालपाखें थ्व ज्याय् सक्रिया जुपिं सकल स्वास्थ्यकःमि, महिला सामुदायिक स्वास्थ्य स्वयंसेविकालिसेंया साझेदारपिंत सुभाय् देछानादीगु दु । “थ्व ऐतिहासिक उपलब्धि नेपाः सरकारया दृढ इच्छाशक्ति, चाःन्हि मधासें जुयादीपिं सकल स्वास्थ्यकःमि लिसें महिला स्वास्थ्य स्वयंसेविकाया मदिक्कं कुतः, सचेत नागरिक समाजया सक्रिय ब्वति व झीगु विकास साझेदारपिनिगु मदिक्कं कुतः व समन्वयपाखें ताःलाःगु खः”, वय्कलं धयादीगु दु । थ्व उपलब्धियात कायम यायेत व भविष्यय् थुजाःगु ल्वय्पाखें नागरिक व विशेष यानाः मस्तय्त पूवंकं सुरक्षित तय्त प्रद्धिवद्ध जूगु धयादिसें वय्कलं थुकिया निंतिं झीसं मदिक्कं खोप सेवाया पहुँच विस्तार, ल्वय्–निगरानी प्रणालीया सुदृढीकरण लिसें न्हंकाछ्वये लिपाया कार्ययोजनायात प्रभावकारी कथं कार्यान्वयन यायेगु धयादिल ।