फागुन १० निसें स्वयम्भू महोत्सव

 स्थानीय म्हसिका व सम्भावना प्रवद्र्धन यायेया निंतिं येँ महानगरपालिका वडा नं १५ या ग्वसालय् थ्व हे फागुन १० निसें १७ गतेतक न्हापांगु ‘स्वयम्भू महोत्सव’ न्यायेकेत्यंगु दु । थुगु वडाया प्राकृतिक सुन्दरता, मनूतसें दयेकातःगु धार्मिक, सांस्कृतिक तथा सामाजिक संरचना, तजिलजि, मठ मन्दिर, चैत्य, गुम्बा, सतः, विहार नापंया प्राचीन स्मारक प्रवद्र्धन यायेगु तातुना महोत्सव न्यायेकेत्यंगु खः । महोत्सवपाखें त्वपुनाच्वंगु प्राचीन स्मारकत पर्यटकीयस्थलया रुपय् न्ह्यब्वयेखनिगु थौं थन ग्वसाःग्वगु पत्रकार सम्मेलनय् वडाध्यक्ष इश्वरमान डङ्गोलं कनादिल । महोत्सवय् वडापाखें उद्यमशीलता व जीविकोपार्जनया निंतिं तालिम काःपिं व्यक्ति व सङ्घसंस्थां उत्पादन याःगु हलंज्वलं, स्थानीय उत्पादन, तरकारी व सिसाबुसा, ऊन तथा कां थानाः दयेकाः तःगु वसःया ब्वज्या जुइ । स्वयम्भूया भुईंख्यलय् महोत्सव जुइ । भगवान् पाउया धर्मचक्र पार्कय् ब्वज्या व वडास्तरीय विपद् व्यवस्थापन, खोज उद्धार लिसें पुनःस्थापनाया ब्वज्या जुइ । महोत्सवय् थ्यंमथ्यं ६० गू स्टलपाखें ब्वज्या र सेवा बिइगु ज्या जुइ । परम्परागत बाजं, वडाबासीया जन्मंनिसें मृत्यु पर्यन्तया संस्कारनाप स्वानाच्वंगु चित्र, संस्कृति र परम्परानाप स्वानाच्वंगु चित्र, बुद्धया जीवनीनाप स्वानाच्वंगु चित्र, हुलाक टिकट र ग्वः धेबाया ब्वज्या जुइगु वडाध्यक्ष डङ्गोलं कनादिल । बिस्कं नसाया स्टल, स्वास्थ्य परीक्षण, रक्तदान, रञ्जना लिपि च्वज्या, ख्वाया चित्रकारितासहित सांस्कृतिक व मनोरञ्जनात्मक ज्याझ्व व कासा महोत्सवका थप आकर्षणत जुइ । स्वयम्भू महाचैत्य १५ नं वडाया विशेष म्हसिकाका रुपय् धस्वानाच्वंगु दु । थुगु वडाय् शान्तिपू, हारती माँ, महामञ्जुश्री, लखु तीर्थ, विष्णुमती खुसी सिथय् च्वंगु शोभाभगवती देगः, सरस्वती देगः, विहारलिसें देवालयत लानाच्वंगु दु । –––