खोटाङया त्रिधार्मिकस्थल हलेसी बजारय् आइतबाः सनिलय् च्याःगु मि प्यघौ लिपा स्याःगु दु ।
हलेसी तुवाचुङ नगरपालिका–७ महादेवस्थानया हलेसी बजाःया पद्म राईया भुतूया ग्यास सिलिन्डरं सनिलय् ६ ताः ईनिसें पिज्वःगु मियात स्थानीयवासी व सुरक्षा निकायया मंकाः कुतलं बहनी ११ ता ईपाखे नियन्त्रणय् काःगु खः ।
मि च्यानाः स्थानीय पद्म राईया छेँ व छेँय् चायेकातःगु हार्डवेयर पसः, निर्धन उत्थान लघुवित्तया ज्याकुथि, आइराज राई व प्रकाशचन्द्र गिरीया छेँय् क्षति जूगु दु ।
मिं नयाः मानवीय क्षति मजूसां तःल्याखय् धनमाल नष्ट जूगु स्थानीयया धापू दु ।
सुख्खा लागा हलेसीइ च्याःगु मि स्यायेत लः मदया समस्या जूगु इलाका प्रहरी ज्याकुथि हलेसीया प्रहरी निरीक्षक हेमन्त राईनं धयादिल ।
“मि च्यानाः निखाः छेँ पूवंक व छखा छेँय् आंशिक क्षति जूगु दु । मेमेगु क्षतिया विवरण मुनेगु ज्या जुयाच्वंगु दु”, वय्कलं धयादिल, “मि नयाः स्वखा छेँ, छगू लघुवित्तया ज्याकू, हार्डवयेर व ग्यास पसलय् क्षति जूगु दु । फुक्कं क्षतिया विवरण स्वयेबले छगू क्वःतिं मल्याक क्षति जूगु अनुमान दु ।”
मि स्यायेत जिल्लाया स्वंगूलिं सुरक्षा निकाय्या पुचःत हलेसी थ्यंगु खः । पद्म राईया छेँय् बहनी नसा ज्वरे यायेत्यंबले ग्यास सिलिण्डर लिक जुया न्यनावंगु मि दमकल मदया तुरुन्त स्याये मफुगुलिं यक्व क्षति जूगु स्थानीय सयन्द्र राईनं धयादिल ।
