पाँचखालया ल्वगितय्त निःशुल्क हि बिइगु

काभ्रेपलाञ्चोक, १४ पोहेलाथ्व : पाँचखाल नगरपालिकापाखें ल्वगितय्त मदयेकं मगाःगु हि माःकथं सितिकं कायेफइगु व्यवस्था जूगु दु । थुकिया निंतिं जिल्लाय् च्वंगु रक्त सञ्चार केन्द्र व पाँचखाल नगर ज्याकुथि दथुइ सम्झौता जूगु दु । नगरवासीयात निःशुल्क हि बिइगु विषयस जूगु सम्झौता पतिइ नगरप्रमुख महेश खरेल व रेडक्रसया जिल्ला सभापति देवेन्द्र भैलनं ल्हाचिं तयादीगु खः । सम्झौताकथं हिया सेवा कायेमाःपिं पाँचखाल नगरपालिकाया स्थायी वासिन्दा जूगु (नागरिकता, मतदाता म्हसीका पौ, बाय्हिलाबुला) दसि पौया लिधंसाय् सितिकं हि बिइगु धयातःगु दु । अथे हे, नगरपाखें फुक्क हे वडाय् रक्त सञ्चार केन्द्रया ग्वाहालिइ पालंपाः दँय् म्होति नं प्यक्वः हि संकलन शिविर ग्वसाःग्वयेगु धयातःगु दु । निःशुल्क सेवाया निंतिं नगरं न्हापां हे स्वंगू लख द्यबाः रक्त सञ्चार सेवायात बिइमाःगु दु । “थुगु सम्झौतां नगरवासीतय्त राहत जुइगु भलया कयागु दु”, खरेलं धयादिल । नगरप्रमुख खरेलं म्होतिं नं छगू क्वःतिया कोषया व्यवस्था यायेत रेडक्रसयात सुझाव बियादिसें कोष न्ह्याकेया निंतिं थःगुपाखें न्यय्द्वः द्यबाःया पुसा ध्यबाः लाय् तयादीगु दु । भैलनं रेडक्रसया कोष व्यवस्थापन यायेत नीन्याद्वः द्यबाः बिइगु धयादीगु दु ।