थौं नेपाली कांग्रेसया संस्थापक नेता कृष्णप्रसाद भट्टराईया १०१ क्वःगु हना न्हि खः । नेपाली कांग्रेस, थुकिया भ्रातृ नापनापं शुभेच्छुक संस्थातसें थौं थी थी ज्याझ्वः यानाः सन्तनेतायात लुमंकाच्वंगु दु ।
विसं २०४७ य् अन्तरिम सरकारया प्रधानमन्त्री जुयादीम्ह भट्टराई २०४८ सालय् प्रधानमन्त्री निवासं छगः ट्याङ्का, सुराही व कुसा छपाः ज्वना कुपण्डोलया पुलांगु डेराय् लिहाँझाःगु खः ।
हलिंया सुं नं राजनीतिज्ञं प्रधानमन्त्री जूगु इलय् जिगु आज्जु मुक्ति (निर्वाण) धाःगु मदुनि, नेता भट्टराईनं खुल्ला रुपं जिगु आज्जु निर्वाण धयादीगु स्वामी अरुण आनन्द लुमंका दी । प्रधानमन्त्री जुयादीबले येँया ओशो तपोवनया उलेज्या किसुनजीं हे यानादीगु खः । थःगु जिवंकाछि वय्कः तक्वः हे थन ध्यान च्वनेत झायादीगु खः ।
अरुण आनन्दं किसुनजीयात थःगु खँय् उखेथुखे मजुइम्ह नेता कथं लुमंकादी । अबलेया सरकारं दयेकूगु भ्वँतय् ल्हाःचिं तयाः बिपी कोइराला व गणेशमान सिंह सुन्दरीजल झ्यालखानां पिहाँवःबले नेता भट्टराई अन हे च्वनादीगु वय्कलं लुमंका दी । सन्तनेताया निष्ठाया राजनीति व ल्वहं थेंजाःगु अडानयात वय्कल न्ह्याबलें लुमंका दी अले, उकियात नुगः चकंकाः च्वछायादी ।
“किसुनजी राजनीति दुने हे च्वना नं थःगु कमजोरी धायेत ग्यानामदी, इहिपाः याना मदीम्ह सन्तनेतां जी कुमार मखु धाःगु खँ हे वय्कः गुलि स्पष्टवक्ता राजनीतिज्ञ खः धयागु सीदु । थःगु अडानय् च्वनाः वय्कः भारत प्रवासय् नं मझाः, नेपालय् हे च्वनाः नेपाल विद्यार्थी संघ नीस्वना दिल गुकिया हुनिं वय्कःयात स्वदँतक झ्यालखाना तःगु खः”, अरुण आनन्द धयादी । अहिंसावादी नेताकथं म्हसिकादुम्ह महात्मा गान्धी थें हे किसुनजीयात आध्यात्मिक नेता कथं थःम्हेस्यां म्हस्यूगु वय्कलं धयादिल ।
किसुनजीया सच्छिगु बुसादँया लसताय् थगुने ‘सन्तनेता कृष्णप्रसाद भट्टराई केन्द्र’ पलिस्था यानाः थुकिया नायः लोकेश ढकालं निष्ठाया राजनीति व देय्या विकासय् वय्कलं यानादीगु योगदानया प्रचार यानाच्वनादीगु खः ।
“किसुनजी थःम्हेस्यां हे नीस्वनाःगु पार्टीं मिखाः जायेक ख्वबि तयाः छाय् त्वताझाल ? थुकिया लिसः मालाः स्वयेफुसा व हे वय्कःयात हंगु जू वनी, वय्कलं पार्टी त्वतादिल, आदर्श त्वतामदी, वय्कःया हनाय् केन्द्र पलिस्था यानाःगु खः”, नायः ढकालं धयादिल ।
प्रजातन्त्र पुनःस्थापनाया आन्दोलनय् किसुनजीनापनापं सक्रिय जुयादीम्ह वरिष्ठ पत्रकार पुरुषोत्तम दाहाल पद व द्यबाया लोभ मदुम्ह राजनीतिज्ञ कथं थःम्हेस्यां वय्कःयात म्हसिकाःगु धयादी ।