नेपाल कम्युनिष्ट पार्टी (माओवादी केन्द्र) लिक्क लाःगु नेपाल राष्ट्रिय कर्मचारी महासङ्घं खुसिबाः व चलखं पीडित जूपिंत न्हय्गू लख व ७७ द्वः लःल्हाःगु दु ।
महासङ्घया अध्यक्ष मणिरत्न श्रेष्ठं थौं सुथय् पार्टी अध्यक्ष पुष्पकमल दाहाल ‘प्रचण्ड’यात उगु ध्यबाया चेक लःल्हानादीगु खः ।
उगु हे झ्वलय् खुसिबालं पीडितय्त ग्वाहालि याःगुलिं सङ्गठनया दुजःतय्त नं कृतज्ञता ज्ञापन यासें अध्यक्ष दाहालं जनताया समस्या ज्यंकेत थःगु पार्टीं न्ह्याबलें न्ह्यःने च्वनाः ज्या यानावयाच्वंगु न्ह्यथनादिल ।
पुनःस्थापना यायेगु ज्या आःतक नं मजूगुलिं च्यूताः प्वंकुसें वय्कलं निदँ न्ह्यःया भुखाचं पीडित जूपिं व नकतिनि हे धैथें वःगु खुसिबाः व चलखं पीडित जूपिंत समाजया फुक्क थासय् ग्वाहालि माःगु धयादिल । ग्वाहालि ध्यबा बिइत महासचिव प्रेम खनाल, नेपाल राष्ट्रिय निजामती कर्मचारी सङ्गठनया अध्यक्ष अम्बादत्त भट्ट लिसेलिसें महासङ्घ व सङ्गठनया दुजःतय्सं ब्वति कयादीगु खः ।
- रासस