प्रेम मोहन गीता सिरपाः गुथिया ग्वसालय् मोहनि नखः ११४४ या लसताय् असोज २४ गते बिहीवाः येँय् भिंतुना कालबिल ज्याझ्वः जुल ।
सिरपाःया दाता भाजु ई. मोहनकृष्ण डंगोलया ८८क्वःगु बुदिं हनालिसें मोहनी नखःया लसताय् भिंतुना कालबिल ज्याझ्वः जूगु खः।
येँया नेपाः ब्याङ्क्वेटय् जूगु भिंतुना कालबिल ज्याझ्वलय् येँया पूर्वमेयर विद्यासुन्दर शाक्य, दाताया छेँजःपिं, नेवाः देय् दबूया नायः पवित्र वज्राचार्य, नेपालभाषा केन्द्रीय विभागया नायः राजनलाल जोशी लिसें नेपालभाषा ख्यःया आपालं व्यक्तित्वपिनि ब्वति दुगु खः।
सिरपाः गुथिया नायः पवित्र कसालं गुथिपाखें सकलसित मोहनि नखःया भिंतुना बियादीगु खः ।
ज्याझ्वलय् दाता डंगोलया म्ह्याय् व सिरपाः गुथिया छ्याञ्जे रेणुका बासुकलां लसकुस यानादीगु खःसा शरद कसालं नेपालभाषा नाटक विधाबारे न्ववानादीगु खः।
नेपालभाषा साहित्यया ज्वःमदुम्ह व्यक्तित्व प्रेमबहादुर कसाःया नामं दातापिं ई. मोहनकृष्ण डंगोल व गीता डंगोलपिन्सं नीस्वनादीगु थुगु सिरपाः गुथिं निदँय् छकः पालंपाः उपन्यास व नाटक विधाया सफूयात सिरपाः बियावयाच्वंगु खः । वइगु दँय् नाटक विधायात सिरपाः बीत्यंगु खःसा सिरपाःया निंतिं ने.सं. ११४५ बछलाथ्व दशमि दुने सफू दुतिनेत नं गुथिं आह्वान याःगु दु।
