नेपालभाषाया साहित्यिक संस्था मिसा साहित्यकार मुनाया न्हूगु ज्यासना पुच: ल्यज्या जूगु लसताय् ने.सं. ११४४ तछलाथ्व दुतिया (२०८१ जेष्ठ २६ गते) छगू औपचारिक मुँज्या जुल ।
न्वकू दिव्या ताम्राकारं लसकुस यानादीगु उगु मुँज्याय् न्हूम्ह नाय: बिमलप्रभा बज्राचार्यपाखें निवर्तमान नाय: अन्जना ताम्राकारयात सुभाय् पौ व निर्वाचन अधिकृतया जुयादीम्ह संस्थाया सल्लाहकार एवं साहित्यकार भाजु ध्रुव मधिक:मियात लुमन्ति चिं ल:ल्हानादिल ।
नापं न्हू ज्यासना पुच:या दुज:पिंत व साधारण दुज:पिंत जीवंकाछी दुज:या दसिपौ ल:ल्हायेगु ज्या जुल ।
सर्वसम्मतं निर्वाचित जुयादीपिं न्हू ज्यासना पुच: छसीकथं नाय: बिमलप्रभा बज्राचार्य, न्वकु दिव्या ताम्राकार, न्वकु बिमला मानन्धर, मू छ्याञ्ज्ये दिब्या बज्राचार्य, छ्याञ्ज्ये भवानी तुलाधर, दांभरी रिता महर्जन व ल्यूदांभरी रेणु श्रेष्ठ जुयादी । अथे हे साधारण दुज:पिं राजेश्वरि राजोपाध्याय, पूर्णिमा डंगोल, मिलन शाक्य, मिमला शर्मा, मिनर्भा शर्मा, अर्चना शाक्य व दीपना शर्मा जुयादी ।
नुग: खँ तयेगु झ्वलय् निवर्तमान नाय: अन्जना ताम्राकारं न्हू ज्यासना पुच:यात भिंतुना बिसे मिसा साहित्यकार मुनाया निर्वाचन प्रक्रिया बारे ध्वाथुईकेसें गुकथं निर्वाचन जुल धयागु खँ कुलादिल ।
साहित्यकार ध्रुव मधिक:मिं साहित्यया थी थी विधाय् ल्हा:न्ह्या:पिं मिसा च्वमिपिं दुथ्यानाच्वंगु थुगु संस्थां आ: न्हून्हूगु ज्याझ्व: यानायंकेमा:गु, थ:पिसं यानागु ज्याया दस्तावेज दुथ्याका: पत्रिका पिथनेमा:गु व मेमेगु साहित्यिक संस्थानाप सहकार्य याना: न्ह्या:वने मा:गु खँय् ब:बियादिल ।
पुलाम्ह मू छ्याञ्ज्ये बिमला मानन्धरं आयाम्ह नव निर्वाचित मू छ्याञ्ज्ये दिब्या बज्राचार्ययात संस्थाया माईन्युत व दस्ताबेजत ल: ल्हासें मिसा साहित्यकार मुनाया नीस्वना बारे दुग्यंक कनादिल ।
न्वचु बीगु झ्वलय् नाय: बिमलप्रभा बज्राचार्यं संस्थायात धिसिलाकायंकेगु ज्याय् सकसिगुं गुहालि दै धयागु भलसा दु धयादिल ।
थुगु ज्याझ्व: संस्थाया दुज: मय्जुर पुर्णिमा डङोल शाक्यं न्ह्याकादीगु ख: ।