नेपालभाषा एकेडेमीया निंतिं अनक मिडियाया न्ह्यब्वया कथं न्ह्यानावया च्वंगु नेवाःएफ एमया जि नं म्ये हाले सः ज्याझ्वः २५०ब्व पूवंगु लसताय् किपू या किर्तिपुर सिनेप्लेक्स हलय् छगू लसता ज्याझ्वः जुल । उगु हे ज्याझ्वलय् जि नं म्ये हाले सः रेडियो ज्याझ्वःया न्ह्याकामि व म्ये हालामि गंगादेवी महर्जन व ख्यालिजुजु मदन कृष्ण श्रेष्ठं हालादीगु ज्वः म्ये “कतांमरिया रुप छंगु ” या म्ये प्याखं पितब्वज्याया नापनापं म्येहालामि गंगादेवी महर्जनया ” कतांमरि ” म्येचाः नं उलेज्या जूगु खः। ज्याझ्वःया सभानायः अनक मिडियाया नायः नबिन महर्जनं लसकुस न्वचु तयादीगु उगु ज्याझ्वलय् नेवाः एफएमया प्रबन्ध निर्देेशक सन्चारकःमि श्रीकृष्ण महर्जन , स्टेशन इन्चार्ज बिबिशा बीरेन्द्र शाक्य व गंगादेवी महर्जन लगायतं जि नं म्ये हाले सः ज्याझ्वः व नेवाः एफएमया बारे थीथी खँ तयादिल । उगु हे ज्याझ्वलय् विशिष्ट पाहाँपिं ख्यालिजुजु मदनकृष्ण श्रेष्ठ , संगीतख्यःया न्ह्यलुवापिं रत्न बेहोशी बज्राचार्य व जुजुकाजि रन्जित, लोककवि राजभाइ जकःमि, न्ह्यलुवा संकिपा पत्रकार विजयरत्न असंबरे, नांजाम्ह संगीतकःमि जुगल डंगोल व अनक मिडियाया नबिन महर्जन पिन्सं मंका कथं ” कतामरी ” म्येचाया पितब्वज्या यानादीगु खः । उगु म्युजिक भिडियोयात कया पाहाँपिं असंबरे , जुगल डंगोल लगायतं न्ववानादीगु खः । ज्याझ्वलय् रवि सायमिं निर्देशन यानादीगु ” कतांमरीया रुप छंगु ” म्ये नं पितब्वज्या जूगु खः । उगु भिडियो या किपालुमि रोमन मार्स,हुलाप्याखं स्यनामि कृष्णभक्त महर्जन, लय् चिनामि व बाजं ग्वसामि जुगल डंगाेल , म्येच्वमि संघरत्न शाक्य , सम्पादन निर्देेशक रवि सायमिं यानादीगु खःसा महेश महर्जनं निर्माण यानादीगु खः ।