पल शाह अभिनित ‘अयलाः अयलाः’ म्यूजिक भिडियो सार्वजनिक

येँ÷गोपाल कृष्ण महर्जनं हालादीगु म्ये ‘अय्लाः अय्लाः’ या म्यूजिक भिडियो सार्वजनिक जूगु दु । ने.सं. ११४४ ञलाथ्व एकादशी (२०८१ भाद्र २९) शनिबाःयेँ सुन्धारास्थित सिटिसि मलय् दुगु सिडिसि सिनेमाय् उगु म्यूजिक भिडियो प्रिमियर याःगु खः । म्यूजिक भिडियो प्रिमियरया झ्वलय् हलया क्षमता स्वयां अप्वः स्वकुमिपिं थ्यंबलय् फिचर संकिपाया थें निगू शो यानाः म्ये क्यनेमाःगु खः ।
दर्शकतय् प्रतिक्रियां थः तसकं हे उत्साहित जुयागु खँ म्यूजिक भिडियोया निर्देशक सुरेन्द्र तुलाधरं धयादिल । ‘बांलाःगु लिच्वः बी फयेमा धकाः मेहेनत यानागु खः । दर्शकतय् प्रतिक्रिया न्यनाबलय् मेहेनत सफल जूगु ताल’ निर्देशक तुलाधरं धयादिल । सृष्टि महर्जनलिसें नांजाःम्ह अभिनेता पल शाहं अभिनय यानातःगु म्यूजिक भिडियो स्वयेबलय् तःधंगु हे बजेट खर्च यानातःगु अनुमान अःपुक हे यायेफइ । ‘नेवाः म्ये धायेवं कम धेबा खर्च यानाः दयेकेमाः धयागु ला मदुनि । दयेकुसेंलि बांलाक हे दयेके धकाः बांलाःगु म्यूजिक भिडियो दयेकेत बजेटय् छुं नं कथं सम्झौता मयाना’ निर्माता तकं खःम्ह म्येहालामि महर्जनं धयादिल ।
म्येया छायाङ्कन किपूस्थित ससःत्वाः, थँबहिस्थित ज्ञण्ह् व टेकुस्थित बम्बीर शिवालय ट्रस्टय् यानातःगु दु । म्येया परिकल्पनाकार नं निर्देशक तुलाधर हे खः । डान्स नम्बर म्येया कोरीयोग्राफी रोहिया महर्जनं यानादीगु दु । सौरभ लामाया डिओपीइ इश्वर लाल सिंकेमनां छायाङ्कन यानादीगु दु । दृश्य सम्पादन सुजन बडालं यानादीगु दु । म्येग्वः पवन जोशीं च्वयादीगु खःसा अनिल तुलाधरं लसय् हनादीगु दु । सिडिसि सिनेमाय् प्रिमियर जुयाकथं थुगु म्यूजिक भिििडयो ओएसआर डिजिटल युट्युबमार्फत विश्वब्यापी सार्वजनिक जुइधुंकूगु दु ।