सांस्कृतिक बहुकला प्रतिभाया धनी रसना महर्जनया रसं जाःगु कला “तालया स” याकः परम्परागत ताल बाजा कन्सर्ट भदौ २९ गते शनिवाः जुइत्यंगु दु । नेपाल कला संस्कृति उत्थान समाजया ग्वसालय् जुइत्यंगु उगु ज्याझ्वलय् रसनाया थिथि बाजं नापं थःगु प्रतिभा न्ह्यब्वइगु ग्वसा खलःपाखें जानकारी वगु दु ।
ज्याझ्वलय् बरिष्ठ वाद्य संगीत गुरु न्हुच्छे बहादुर डंगोल मूपाहाँ कथं उपस्थित जुइगु खःसा रसना महर्जनं थीथी परम्परागत बाजात खिं, कोँचाखिं, चिग्वः धिमे, हार्मोनियम, बाँसुरी, बय्, मादल, तबला, कान्तां दबदब (डमरु), नगरा बाजात न्ह्यब्वइगु खः । अथेहे महर्जनं शास्त्रीय चचा प्याखं मनमैजु प्याखं, भरत नाट्यम, धिमे प्याखं नं न्ह्यब्वइगु ग्वसाः खलः पाखें जानकारी ब्यूगु दु ।
।
परम्परागत संगीतयात जगेर्ना लिसें उत्थान यायेगु आज्जु व उद्देश्यया लिसें पलिस्था जूगु नेपाल कला संस्कृति उत्थान समाजया भाद्र २९ गते शनिवाः जुइगु रसना महर्जनया याकः परम्परागत ताल बाजा कन्सर्ट “तालया सः” निगूगु न्ह्यब्वया खः । थ्वसिबें न्ह्यः कीर्तिपुर सिनेप्लेक्सय् हे किपू नगरव्यापी संगीत महोत्सव न्हापांगु ज्याझ्वः कथं ग्वसाः ग्वयेधुंकूगु दु ।