बिनिता बज्रायार्य
न्हाय्कं न्ह्यःने दनाच्वंगु प्रतिबिम्बं,
जित हिस्यानाच्वन ।
जिगु सुन्दरताया दसु बिइम्ह
यच्चुगु न्हाय्कं,
ईया प्रहारं झन्झन् बुलुया वनाच्वन ।
हिलावंगु इया हिलावंगु ख्वाःपाः !
कलमं झ्वय्झ्वय् पियातःगु थें,
कय् कय् कुना,
तनावनाच्वंगु रुपरंग ।
छुं छुं लुमं थें, छुं भचा ल्वःमं थें,
लुमन्तिया फसय्,
हुस्लुं पुया तक्यनाच्वंगु ई ।
गन जि दनाच्वना,
ह्ययेका लाकायंके धुंकूगु,
थःगु जुयाः नं,
थःगु धाये मदुगु दबुलिइ ।
सासः ल्हानाच्वना,
उकुस मुकुस दंगु लकसय् ।
छचाखेरं शुन्यताया आभास्,
निराशाया ख्युँगुलिं क्वत्यत्यं वनाच्वंगु,
अन्तरआत्माया सः ।
अय् नं ल्यंका तया छम्हुचा सासः,
गनं छपुलु आशाया जः थिना,
इलं त्वःता वने धुंकूगु बुलुगु किपाय्
न्हुगु, थीगु रंग छायेपिइ तिनि ला थें !
झिंनिदँय् ल्याहाँ वइगु खुशि थें तुं
व ई हाकनं
ल्याहाँ वइ तिनि ला थें !
नुगःया छकु कुंचाय्,
बुलुहुँ पुलुक्क पालुक्क
विश्वास दनाच्वन ।
गनं मखंक भौ पलाखय् वया
जितः तेज्जु याः वइतिनि ला थें !
प्वंगु ल्हातं व ई फ्वनाच्वना !
सुपाँय् चिलावना यच्चुगु सर्गः थें,
इलं गायाच्वंगु धूयात चिइका,
यच्चुगु न्हाय्कनं,
जिगु अस्तित्वयात प्रतिबिम्बित याना,
हाकनं ब्वइतिनि ला थें !
जिं व ई पियाच्वना
जिं पियाच्वनागु ई ।