नेपालभाषाया म्ये व संगीतख्यलय् बागमति भाइ धका चर्चितम्ह सुन्दर श्रेष्ठं च्वयादीगु ” नुगलय् दुने सुचुके धुन ” म्येया म्युजिक भिडियो सुक्रबार पितब्वज्या जूगु दु ।
नेवाः साधना कला केन्द्रपाखें ग्वसाःग्वगु छगू ज्याझ्वलय् उगु संस्थापाखें दयेकूगु नुगः दुने सुचुके धुन…या म्यूजिक भिडियो यँय् छगू बःचाधंगु ज्याझ्वःया दथुइ मूपाहाँ निर्देशक पवन जोशीया ल्हातं पितब्वज्या जुल ।
गोविन्द ह्यूमत व दिपा महर्जनं हालादीगु थ्व म्येय् नांजाम्ह न्ह्यलुवा संगीतकःमि गोविन्द ह्यूमतं लय चिनादीगु खःसा भुपेन्द्र बज्राचार्यं बाजं ग्वयादीगु खः । थुके प्याखंम्वः कथं सुरज नापित व लीला जोशी पिन्सं अभिनय यानादीगु दु ।
म्यूजिक भिडियाेय् मीरा डंगोलया समाः अले सोहन मानन्धरया क्यामरा व सम्पादन दु ।
पितब्वज्या ज्याझ्वःया मूपाहां पवन जोशी अले पाहांपिं विजय रत्न असंबरे व पौभाः सायमि खःसा ज्याझ्वः नेवाः साधना कला केन्द्रया नायः सुन्दर मान श्रेष्ठ (बागमति भाइ) या नायःसुइ न्ह्याःगु खः ।
उगु ज्याझ्वलय् म्यूजिक भिडियोस दुथ्याना दीपिं कलाकार , प्राविधिक व सांगितिक व्यक्तित्वपिनि या नापनापं ग्वाहालि यानादीपिन्त मेडल, व दसिपौ लःल्हागु खःसा म्यूजिक भिडियोया निर्देशक पवन जोशीयात दसिपौ, मेडल व मतिनाया चिं लःल्हाःगु खः ।
ज्याझ्वलय् विजय रत्न असंबरे, गोविन्द ह्यूमतपिन्सं म्यूजिक भिडियोयात कयाः थःथः पिनि बिचाः प्वंकादीगु खःसा झी सकसिनं नेवाः मांयात लुमंकाः नेवाः नुगलं भबियाः फचिंफत्तले नेवाः भासं हे मे हालेमाःगु तर झीसं खय् भासं नं सुं स्वयां म्ह मजुइक तःजिक पलाः छीफु धकाः क्यनेभनं खय्भासं नं ज्या यायेमाःगु खँयात लुमंकाः संगीतया महत्वयात कयाः कुलादीगु अले नेवाः साधना कला केन्द्रया ज्याखँयात लुमंका दीगु खः ।
ग्वसाखलःया पाखें मिनर्वा श्रेष्ठं लसकुस यानादीगु उगु ज्याझ्वलय् नायः भाजु सुन्दर मान श्रेष्ठं (बागमति भाइ ) सुभाय् देछानादीगु खः ।