सांस्कृतिक संस्थानपाखें छगु ज्याझ्वःया दथुइ ३२ क्वःगु ब्याचपिन्त बिदाई यागु दु । रामभजन कामतं च्वयादीगु व सबनम सिलवालं निर्देशन यानादीगु ‘शुभाशीष’ नाटक थुगु ज्याझ्वलय् क्यंगु खः । शुक्रबार सांस्कृतिक संस्थानं गीत÷संगीत, नृत्य, तबला ÷मादल वादन, नाटकया प्रशिक्षार्थि पिन्त विदाई व अभिनन्दन यागु खः । शुभाशिष नाटकया माध्यमं वैदेशिक रोजगार व अध्ययनया नितिं विदेशय् वनीपिं नेपाःमि ल्याय्म्हत स्वदेश लिहाँ मवइगु, गां व समाजय् ज्येष्ठ नागरिकत जक च्वनेमाःगु वर्तमान परिवेश क्यनातगु दु । प्याखंया सुरुइ थः मस्तय्त युरोप वा मेमेगु देशय् छ्वये दत धकाः गर्वपूर्वक चर्चा यानादीम्ह ज्येष्ठ नागरिक जीवनया अन्तिम इलय् थः मस्तय्गु मतिनां मदयाः तसकं दुःखी जूगु खः ।
ज्याझ्वःलय् मुँपाहाकथं झायादिम्ह संस्कृति, पर्यटन तथा नागरिक उड्डयन मन्त्रालयया सहसचिव डा. सुरेश सरस श्रेष्ठं विगतय् समुदायय् अभ्यास व लःल्हाना वयाच्वंगु सांस्कृतिक प्रतिष्ठान व मेमेगु अमूर्त सम्पदाया म्ये÷संगीत व प्याखंया माध्यमं न्हू पुस्तायात विकास व स्यनेगु वातावरण बियागु धयादिल । सांस्कृतिक प्रतिष्ठानया महाप्रबन्धक किरणबाबु पुनं म्ये, शास्त्रीय संगीत, तबला, बाँसुरी थायेगु, चर्या व सोरथी नृत्य लगायतया थीथी अमूर्त सम्पदाया बारे नियमित रुपं प्रशिक्षण न्ह्याका वयाच्वंगु जानकारी बियादीगु दु । ज्याझ्वलय् गायन, नृत्य,नाटक, तबला, मादल व बाँसुरी प्रशिक्षार्थीपिन्सं थपिनि प्रतिभा न्ह्यब्वःगु खः ।