नेपालं थौ इरानयात सेमिफाइनलय् बुकाः सेन्ट्रल एसियन भलिबल एसोसिएसन (काभा) मिसा नेशन्स लिगया फाइनलय् थ्यंगु दु ।
त्रिपुरेश्वरया राष्ट्रिय खेलकुद परिषद् (राखेप) कभर्डहलय् थौं जुगु कासाय् नेपालं इरानयात ३–० या सोझो सेटं त्याकुगु खः । नेपालं इरानंयात २५–२१, २८–२६, २५–२० या सेटं त्याकुगु खः । लिग चरणय् नेपाल इरानलिसे ३–२ या सेटं बूगु खः ।
कन्हे जुइगु फाइनलय् नेपाल भारतनाप म्हितिगु जुगु दु । मङ्गलबाः हे जुगु भारत व श्रीलङ्काया कासाय् ३–० या सोझो सेटय् भारतं श्रीलङ्गायात त्याकाः फाइनलय् थ्यंगुं खः । भारतं २५–१५, २५–१६, २५–२३ सेटय् त्याकुगु खः ।
लिग चरणय् नेपालं भारतयात ३–२ या सेटं त्याकुगु खः । महिला भलिबलय् नेपालं भारतयात त्याकुगु थ्व न्हापांगु खः । नेपाल फाइनलय् थ्यंगुंलि नेपाःमि हर्षित जुगु दु । जम्मा द्वछिम्ह स्वकुमि न्ह्यंगु कर्भड हल जुगुलिं स्वकुमिपिं मारय् लागु दु । आशाकाय् थ्व कासा धुंका नेपालय् नं अझ बांलागु हल दय्कि अले खेलाडिपिन्त हौसला विइत स्वकुमिपिनिगु इच्छा पुरा जुइ ।