लिपांगु न्हि ब्वमिपिन्त आकर्षण यायेगु नामय् अप्वः थें संस्थागत विद्यालयं अङ्ग्रेजी नां तयेगु यानाच्वंगु दु । लिसें युरोप, अमेरिकालिसेंया विकसित देस् उत्कृष्ट तायेकूगु शैक्षिक संस्थाया नां तयाः विद्यालय चायेकीपिं नं यक्व दु । उव्वःगु विद्यालयं नेपालीपनया संरक्षण याये मफुगु धासें महानगरपालिकां आवंलि अनिवार्य नेपाली हे नां तयेत निर्देशन ब्यूगु दु । नेपालीपन पिब्वइकथं नां मछुइगु विद्यालययात आगामी शैक्षिक सत्रनिसें विद्यार्थी भर्ना तकं दिकाबीगु चेतावनी महानगरपालिकां ब्यूगु दु ।
येँय् जक मखुसे मेमेगु जिल्लाय् नं अङ्ग्रेजी विद्यालयया नां तयेगुल नाम चलन अप्वःगु दु तर येँ महानगरपालिकां जक नेपालीपन पिब्वइगु नां तयेत निर्देशन ब्यूगु खः । अझ विद्यार्थी दथुइ थःत ब्यागलंकथं विद्यालयं नांलिसें इन्टरनेसनल खँग्वः स्वाकेगु चलन नं दु। तर इन्टरनेसनल शब्द स्वाःसां उज्वःगु विद्यालयं विदेशी देसय् विद्यार्थी धाःसा ब्वनीमखु ।
येँय् ह्वाइटहाउस, ट्रिनिटी, मिल्सबेरी, युरो किड्स, किड्जी, ब्राइट फ्युचर, लिभरपुल, गोल्डेन गेट, ग्लोबल, प्रिमिअर, जेम्स, नाइटिङ्गल, लिटिल एन्जल्स, हेराल्ड थुज्वःगु अङ्ग्रेजी नामय् सञ्चालित विद्यालय दु । महानगरपालिका शिक्षा विभागया कथं महानगरपालिकादुने अङ्ग्रेजी वा विदेशी शैक्षिक संस्थाया नां तयाः न्ह्याकाच्वंगु संस्थागत विद्यालयया सङ्ख्या ३२३ गु दुगु महानगरपालिकाया शिक्षा विभागया निमित्त प्रमुख सरस्वती पोख्रेलं कनादीगु खः । उगु विद्यालयया नां रुजु यायेगु ज्या जुयाच्वंगुलिं ल्याः च्वय्क्वय् जुइफुगु वय्कलं कनादिल । रुजु जुइधुंकूगु फुक्क विद्यालययात लिखित पत्राचार यानाः नेपालीपन पिब्वइगु नां तयेत सचेत याकेगु व पत्राचारया ज्या थौंनिसें न्ह्याकीगु जूगु दु ।