काठमाडौं सुनचाँदी व्यवसायी संघया नकतिनि जूगु चुनावय् निर्विरोध निर्वाचित जूम्ह नायः रोहिनादेवी शाक्य लगायतयात येँदेया शाक्य कुलया झिगु बहाया मंका संगठन शाक्य महाविहार संघया ग्वसालय् छगू भिन्तुना देछायेगु ज्या जूगु दु । शाक्य महाविहार संघया नायः शुभकाजी शाक्यया सभानायसुइ जूगु उगु ज्याझ्वलय् व्यवसायी संघया नायः रोहिना शाक्य, न्वकु उपेनकाजी शाक्य व छ्यान्जे लेखरत्न शाक्ययात नं नेवाः तजिलजि कथं ख्यें सगं बिया भिन्तुना देछागु खः ।
महाविहार संघया मूछ्यान्जे संघरत्न शाक्यं लसकुस याना न्ह्याकादीगु उगु ज्याझ्वलय् व्यवसायी संघया नायः रोहिना शाक्यं लुँ वहया ज्याया परम्परायात म्वाकातःपिं व न्ह्याकावःपिं शाक्य कुलयापिं हे खः धका धयादिसे थौंकन्हे थ्व ख्यलय् शाक्यत व नेवाःत म्हो जुयावःगुलिं चिन्ता प्वंकादिल ।
अथेहेतुं ज्याझ्वलय् व्यवसायी संघया छ्यान्जे लेखरत्न शाक्यं लुँवहया तिसा दयेके मनदुपिं शाक्य परिवारया ल्यायम्ह पुस्तायात माःकथं ग्वाहालि यायेगु व प्रशिक्षण बिइगु खँ न्ह्यथना दिलसा न्वकु उपेनकाजी शाक्यं नं लुँ वहया व्यवसाययात व्यवस्थित याना यंकेगु पाखे व्यवसायी संघया पलाः अझ क्वातुका यंकेगु खँ कनादिल ।